اقضوا اليوم معي/ اعادة بناء حياتي

Apr 30

أهلاً يا أصدقاء.. من شهر مريت بتعب شديد والحمدلله بأول هذا الشهر بديت اتحسن. لكن سبحان الله صرت امر ببداية اكتئاب ومالي نفس أسوي شيء غير الأساسيات

وايضاً عندي شعور بالإحباط او جمله تتكرر براسي ايش الفائدة! المهم صحيت اليوم وحسيت ان كافي لازم أوقف هذا الشعور عشان ما يطور ويصير اكتئاب فعلي. فاقضوا اليوم معي بطريقتي في اعادت بناء حياتي

تدوين يومي — الساعة ٨ المساء

التدوين و التخطيط

انا صاحية من بدري وسويت كم مهمه، فقلت ضروري اجلس الحين ادون لكن قبل خلوني احكي لكم عن القهوه هذي. شفت اختي معها قهوه كوري ما شاء الله بالعافية عليها قلت لها اعطيني إياها قالت لا 😔جريئه انا 🫠المهم قالت لي خذي هذي القهوة. مو اول مره اشربها طعمها على توفي او بندق كذا المفروض اشربها ساده بس حطيت حليب

ما علينا انا صايره ما ادون يوميا وهذا غلط أدري، وهو سبب من الأسباب الي راكم المشاعر السلبيه جواتي. يعني صرت اجلس يومين وثلاثه واكتب باختصار كيف كان يومي وانتهى لكن قررت ارجع من اليوم بأذن الله اكتب عن مشاعري انا ايش مضايقني وافضفض اكثر عشان اتحسن

بعدها قررت اني اخطط للأسبوع واخطط للكتابة و اكتب عن أشياء محتاجه اركز عليها بنفسي . لان للأسف فيه مواضيع ابتدأت فيها ولسى مانهيتها . طبعا امر التخطيط هذا يفيدني كثير لأنه يساعدني اشوف انجازاتي اليومية، عكس مثلا لو ما كتبت مارح أكون منتبه انا ايش سويت خلال يومي واسبوعي. المهم بهذا الأسبوع حطيت عباره في المخطط لا للاكتئاب ومحاربة الظروف القاسية

سبحان الله بالصدفة بديت اقراء هذا الكتاب كأني كنت حاسه اني رح اتعب نفسيا.ً سمعت عنه من زمان ويقولون انه مفيد. انا لسى في اول فصل بس فيه كلام حسيته جاء بوقته لأنه نفس الي امر فيه حالياً. صورت لكم بعض الصفحات الي شدوني اكثر شيء

لما احس بمشاعر سلبيه نفس كذا احياناً تجيني لحظت جرأه او اني ابغى اسوي شيء جديد بروتيني عشان انبسط واغير جو. من ثلاث او اربع شهور جتني لحظه نفس كذا وقمت قصيت شعري سويت لنفسي غره😅 وكان شعور جميل صراحه. فقررت اني استشور اليوم واقص شعري مارح اقص كثير يعني ٣ انشات بس 😁. وكان عندي قابليه أقص اكثر بس قلت لا خليها لوقت اخر 😂 وتركت المقص بحاله

بس الحمدلله حسيت بتغيير المزاج والراحة من بعد القص. وصار عندي حماس ارجع اهتم بشعري واطول الثلاث انشات الي قصيتها بكره ان شاء الله 😅. ترى امزح مو حقيقة مافي شيء كذا أصلا وياريت لو الأمور الي بدنيا تصير كذا. المهم انا احب اسمع لبودكاست محفز لما استشور شعري عشان ماحس بملل واشحن طاقتي

اعترف اني برمضان اهملت بموضوع الاكل كثير، يعني ماكنت اهتم اني اراقب انا ايش قاعده اكل او اشرب وحتى فيتامينات ما كنت اخذ. فعشان كذا مرضت بشهر شوال وكان سببها نظامي الغذائي السيء في رمضان. بس الحمدلله من لما مرضت رجعت للفيتامينات وصرت اطبخ اكلي بنفسي واعرف انا ايش اكل واشرب

جورنال يومي — الساعة ١ الصباح

نوتة جديدة

دفتر التدوين اليومي حقي خلاص باقي له ٦ صفحات ويخلص. فعلى طول طلبت نوته جديده كنت ابغى وحده اكبر منها شفتها بالمكتبة الي بالحاره بس للأسف خلصت😔 . فقلت يلا اشتري نفس حقتي القديمة وامري لله. فيه تغيير بلون التجليده هذي المره، وحطيت عبارات بالعربي والفرنسي و صور بالأشياء الي احبها عشان اتحمس للتدوين مثل قبل وافضل. مره عجبني شكلها النهائي ما شاء الله ايش رايكم انتم ؟

لوحة الامنيات — الساعة ٢ الصباح

لوحة الأمنيات

باقي شهر ونص وتنتهي السنة الهجرية بإذن الله، فعشان كذا قررت اني اعدل على لوحة امنياتي واحذف الأشياء الي مارح اقدر احققها بكل واقعيه خلاص مافيه نصيب تصير هذي السنه. لكن فيه أشياء ما شاء الله سويتها وشفت نتيجتها ومكمله فيها بإذن الله. لأني انا من الناس الي لازم يكون عندي هدف امشي عليه ما عرف أعيش يومي فاضيه وهذا يسبب لي اكتئاب بكل صراحه. فحددت الأشياء هذي الي رح اركز عليهم هالشهرين بإذن الله كان المفروض ابتدئ فيها واسويها من شهر شوال بس سبحان الله مرضت ، يلا قدر الله وماشاء فعل لسى ان شاء الله فيه وقت

ملخص اعادة بناء حياتي

انا كتبت لكم من قبل اني مريت بحالة اكتئاب شديده من سنين ودمرتني نفسياً. فصرت من لما احس بشعور سلبي أتذكر هذيك الفتره وأقول لا انا ارفض ارجع اعيشها مابغى الي سويته بظرف هالسنوات يدمر. واعطي حالي مساحه اني احزن واتضايق عادي بس اوعد نفسي انه ما يطول واني ارجع بعده بنفسيه وطاقه احسن بإذن الله. اعادة البناء مو معناته اني اسوي شيء كبير لا نهائياً هو عباره عن عادات بسيطة لكن اثرها بنفسيتي يكون عميق. يعني انا من الناس الي اشجع العمل بخطوات بسيطة لان نتائجه تكون اكبر بحياتي ما شاء الله بالمدى البعيد

اذكر اول شيء قلته لنفسي اليوم قبل ما ادون سامية مو انتي الي توصلين لهذا الحال لا تسمحين للظروف ادمرك انتي مريتي بالأصعب من كذا وطلعتي منها ما شاء الله بأفضل حال لا تخلين شيء يكسرك ويرجعك لوراء. انتي اقوى مما تظنين وانتي داعم لنفسك من بعد الله. فالروتين والتخطيط والهوايات هي الأشياء الي تخليني اتحسن واتخلص من مشاعر الإحباط

فنصيحتي اذا حسيتوا بمشاعر سيئة او فقدان شغف أعطوا نفسكم مساحه بالزعل مافي مشكله بس لا طول وبعدها شوي شوي سوولكم روتين ومارسوا هواياتكم وابحثوا عن الأشياء الي تحبونها وتغير من نفسيتكم. وأيضاً من الحاجات الي تفيدني دائما اني اسمع لبودكاست محفز او اقراء كتاب عن هذا الموضوع وما شاء الله يحمسني على طول. ترى عادي نتعب نفسياً ويصير معنا احباط وفقدان شغف ما بين الفتره والثانية لأننا بشر فالا تجلدون أنفسكم ولا تقارنونها بغيركم

ما علينا ايش رايكم بروتيني بإعادة بناء حياتي؟ وهل تتفقون معي بطريقتي او لا؟

صحيح حبيت اخبركم اني قررت انشر التدوينات بأيام عشوائية، يعني مارح التزم بيوم الاثنين بإذن الله. لان هذا الي مناسب لي هذي الفتره

❤️أتمنى تكونوا انبسطتوا بالقراءة اليوم وفدتكم بشيء لوبسيط ، وأتمنى لكم ليلة سعيدة ومريحة