اكتئاب ما بعد العيد

الغالب في هذه الأوقات اننا نصاب بتعب نفسي، حزن ، تقلب مزاج و خمول. هذه المشاعر متعارف عليها مابين الجميع يعني انت لست وحدك. وهي ما تسمى بمتلازمة اكتئاب العيد، هي لها عدة أسباب و حلول. لذلك سوف أشارك معكم طريقتي في التغلب على اكتئاب العيد في سبع خطوات سهله وبسيطه

أسباب اكتئاب العيد

 تنويه  مهم : انا لست اخصائية نفسية او طبيبة او لدي شهادة من هذا القبيل و لكن بحثت عن الأمر في الأنترنت وتوصلت إلى هذه المعلومات. بعد بحث و جدت ان يرجع مصدر هذا الاكتئاب إلى ثلاث اسباب : جسديه ، نفسيه او ماديه يعني ممكن يكون واحد فيهم هو السبب وليس بالضرورة جميعها

السبب الجسدي: تغير الفصول، الجو وقلة التعرض للشمس تسبب باختلال هرمون الميلاتونين المسؤول عن توازن النوم و اليقظه و هذا يسبب اكتئاب

السبب النفسي: المشاكل العائلية- لأن التجمعات العائلية أحياناً يكون فيها شحنات بسبب مشاكل قديمه، او فقدان شخص عزيز عليكم، او حتى بسبب تواجد اشخاص غير مريحه في التجمعات الأجتماعية ممكن هذا الشخص يؤذيك بأسلوبه المنفر او احد يسألك ليش ما توظفت او ليش ما تزوجت و هذه الأسئلة متعبه للنفسيه و تسبب توتر و قلق

السبب المادي: بسبب الضغط الي تعرضت له من ناحية مصاريف العيد وقبلها رمضان

طريقتي في التعامل مع الاكتئاب

١-ترك الماضي

لاحظت نفسي من سنين لما كنت امر بهذه المشاعر اني أكون لسى ما طلعت من شهر رمضان و نظامه و العيد و اجواءه . لأن الأمر مو بسيط شهر كامل و انا عايشه نظام حياة معين و غيرت روتيني عشانه . فاكون نفسياً لسى عايشه برمضان و فرحت العيد الجميله و اني ارجع لحياتي العاديه فجأة صعب على عقلي انو يستوعب التغيير. فعشان كذا انا اجلس و افهم نفسي ان رمضان خلص و عشت فيه لحظات مريحة و العيد انبسطت فيه واستمتعت بإيام رائعة . بدل ما اكتئب و احزن، اعتبره ماضي جميل و اكتب عن ملخص شهر رمضان والعيد مثل ماسويت معكم من قبل . عشان اترك الماضي و ألتفت للحاضر الي هو الان

٢-الأمتنان

بعد ما كتبنا ذكرياتنا الجميله في العيد و رمضان ، نجلس نكتب عبارات أمتنان فيهم عشان نحمد الله عليها و نكون تخطينا الماضي و نقفل عليه بشكل نهائي و نلتفت للواقع . رح اكتب كم عبارات أمتنان عشان أساعدكم كيف تبدؤن الكتابة.  و تقدرون تستخدمونها عادي و تضيفون عليها من عندكم

١-انا ممتنه على دعم الله و تيسيره لي بشهر رمضان

٢-انا ممتنه اني ختمت القران (تلاوة) في شهر رمضان

٣- انا ممتنه اني صليت الصلاوات (السنن) طوال شهر رمضان المبارك

٤- انا ممتنه على الدروس إلي تعلمتها في شهر رمضان و العيد

٥- انا ممتنه أني كنت قويه ما شاء الله في التعامل مع الظروف الصعبه ألي مريت فيها فيهم

٦- انا ممتنه ان الصيام هذي السنة كان هين و لين الحمدلله

٧- انا ممتنه أني انبسطت في العيد و اشتريت لبس جديد

٨- انا ممتنه أني كنت بخير وصحه في العيد و رمضان

٩- انا ممتنه أني عشت أيام هادئة في العيد و رمضان

١٠-انا ممتنه على لطف وستر ربي لي في العيد و رمضان

٣-اخذ نفس عميق

أتنفس نفس عميق كذا مره عشان اهداء و اريح اعصابي و أقول لنفسي ان الحمدلله كل شيء رح يكون تمام و الجاي افضل بإذن الله و ان مافي شيء يخوف او يستدعي للقلق و الاكتئاب.هونيها على نفسك لا تشيلين هم حاجه كل شيء بهذي الدنيا يتعوض الا صحتك النفسيه و الجسديه عشان كذا لازم ترمين حمولك على الله و تهدي بالك و كل شيء رح ينحل بإذن الله

mind map/٤-الخريطة الذهنية

الي يحدث ان بعد العيد و الفرحه الي عشناها نحس بفراغ و اننا فاقدين شيء لأن قبل رمضان كنا نجهز لرمضان و نستعد له سواء عباده او حتى للزينة والتفريزات و اشياء كثيره. بعدها في نص او نهاية رمضان نبداء نخطط للعيد و لبس العيد و حلاوة العيد. يعني كنا مشغولين بتحقيق الاهداف طوال الشهرين الي فاتوا . عشان كذا بعد انتهاء العيد و رمضان يكون في شيء ناقص بحياتكم ، ان طيب احنا ماعندنا شيء نتحمس له مثل قبل و رح نرجع لروتين الدوام او الدراسة الممل. من هنا لازم نحط هدف عشان نرجع نتحمس للحياة و نتغلب على الكأبه في الروتين. انا بالعادة استخدم الخريطه الذهنيه عشان احط لنفسي اهداف و يصير اعرف ايش ابغى اسوي بحياتي و ما احس بالفراغ الداخلي. فوائد الخريطة الذهنيه انها تساعدنا نرتب أولوياتنا و أفكارنا مثل ماهو موضح في المثال الي في الصوره

٥-كتابة الأهداف

نجيب ورقه وقلم و نستخدم طريقة الخريطة الذهنية اننا نكتب اهدافنا ايش نبغى نحقق في هذا الشهر او لحتى نهاية السنة الهجرية. خاصه ان احنا في شهر شوال يعني على نهاية السنة ، واكيد كتبتوا لستة اهداف ببداية السنه ياترى هل حققتوا منها شيء؟ اذا نعم برافوا يصير استمروا انكم تشتغلون عليها لأخر السنة. و اذا لا صار عندكم هدف الحين انكم تحققون اهداف هذا العام بدون ضغط انبسطوا بتحقيقها عيشوا التجربه كامله بالانبساط لأن الوصول للحلم ترى ممل لكن ايش يخلينا نحس بلذته هي اللحظات الصعبه و الحلوه الي عشناها و احنا نحققه، نسترجع هذي الذكريات و يصير نستشعر قيمته الي وصلنا لها بتعبنا و مجهودنا

٦- صناعة روتين

الأمنيات المكتوبه مارح تنجز الا بروتين نصنعه بإنفسنا عشان نحققها. اعملي روتين خاص فيك مناسب لحياتك يعني ماعليك من أي احد تشوفينه بمواقع التواصل الاجتماعي انتي حياتك مختلفه عنهم

اعطيكم مثال انا اشتريت نوته عشان ارتب فيها افكاري من ناحية روتيني للشهر كامل. مقسمه النوته لأقسام كل قسم لشيء ، قسم للمشتريات و الميزانية عشان اكتب الأشياء الي ابغى اشتريها او الي نفسي اشتريها مستقبلاً ، عناية جسدية كتبت روتيني بعنايتي بجسمي ، عناية نفسية فيها الأشياء الي حابه اشتغل عليها بنفسي ، هوايات كتبت أشياء تساعدني اني اطور نفسي بهواياتي. جانب عقلي اتعلم لغة و اقراء كتب جديدة. يعني اخذت كل قسم و كتبت عنده هدف او انا ايش ابغى احقق فية. طبعاً مارح اسوي كل هذا بيوم واحد لأنه غلط و صعب، رح اعرض نفسي للتسويف ،القلق و التوتر بزحمة الجدول اليومي و بكذا مارح انجز. يصير ايش اسوي اجيب المخطط الاسبوعي و اكتب فيه الأشياء هذي و احط بكل يوم انا ايش ابغى اسوي من عناية ، في أشياء اسويها أسبوعياً ، يومياً ، شهرياً و أشياء مرتين بالشهر. على سبيل المثال: المهام اليوميه مثل التنفس العميق و الأسبوعي مثل تنظيف البشره، الشهري مثل بديكير الاقدام اجلكم الله ، مرتين بالشهر الحمام المغربي. بمعنى كل بداية أسبوع اجلس اخطط و احط كل عناية بإيام معينة على حسب موعدها يومي او اسبوعي او شهري

٧- حبي حياتك و نفسك

خصصي يوم لنفسك اسبوعياً انك تهتمين بنفسك و لراحتك وبس. انبسطي و عيشي فيه مثل ماتبغين و سوي فيه الأشياء الي تحبينها . لازم تشحنين طاقتك عشان يكون عندك نفس تكملين حياتك و تنجزين و تحققين احلامك