ماذا يوجد في مجلد صوري؟ِ🫣
اهلاً يا أصدقاء.. كيف حالكم وحشتوني جداً🤍 ادري مختفيه ليا فتره بس رح أوضح لكم السبب بعد شوي بأذن الله. لكن اليوم جايتكم بفكره مسليه نغير جو مع بعض. انا شخص عشوائي جداً بالنسبه للصور فخطر ببالي اني اشوف ايش موجود في مجلد الصور او انا ايش افكر فيه هذي الفتره او ايش الشيء الي يلفت نظري لدرجة اني التقط له صوره كاذكرى في جوالي. فحابه أشارك معكم مجلد صوري في الجوال
١-المسجد النبوي
طبعا اول شيء لاحظته صور المسجد النبوي لاني كل ما اروح احب اصوره ماعرف ليه رغم اني اصور من نفس الزاويه لاجديد بس خلاص تعودت لكل زياره صوره
٢ -القطط
انا اعشق شيء اسمه قطط فاتلاقوني كل ماشفت قطه صورتها بكل زاويه ماعرف ما اقاوم صراحه، وجوالي مليان صور عشوائيه لهم. وسبحان الله الشيء الجميل انهم ينجذبون لي ماشاء الله وين ماكنت يجون عندي مثلا هذا القط البرتقالي ناديته من بعيد عشان ياكل واكل بلعافيه عليه وجاء نام عند الشجره القريبه مني رغم انه يخاف من الناس قلت هذا معناته اني شخص نظيف من داخل دام القطط تحبني ما شاء الله 😌
٣-الطبيعه
الي شفته بجوالي كمان صور الطبيعه كل ماشفت بقعه خضراء صورتها ، لاني كنت أتمنى زمان لو اعرف ارسم كان لي محاولات لكن للأسف ماحسيت اني ابغى اكمل او لي طاقه له. وكان سبب من الأسباب اني كنت ابغى طريقه اعبر فيها عن الي بداخلي بالرسم . بس سبحان الله عرفت اني اقدر احصل هذا الامر بالكتابه
٤- القهوه والحلويات
انا احب القهوه و الحلويات مره واحب اصورهم ، لاني أشارك الصور في الموقع . فعشان كذا تحصلوني اصور اكواب القهوه و الحلويات بشكل كبير ماشاء الله. فيه بعض الصور هذي كنت بشاركها معكم من اشهر بس ماصار فيه نصيب
٥-اللغه الفرنسيه
لاحظت اني التقط الشاشه كثير من التطبيق الي استخدمه بالتعلم عشان ارجع اكتب الجمل بالنوته وما انسى. وأيضا صور من بنترست لخطة تعلم اللغه
٦- الأبتلاء
انا امر بعدت ابتلاءات فكون جالسه على الانستا ويطلع لي صور عن الوضع الي أعيشه فقوم احفظ الصور عشان اتصبر، واحب احفظ صور من بنترست بهذا الخصوص كمان مره ساعدني هذا الشيء صراحه
٧-صور عشوائيه
اكتشفت ان عندي صور غريبه بالمجلد فيه بعضها كنت بشاركه معكم بس نسيت والبعض ماذكر ليه صورته أصلا مثل الصوره المغبشه هذي ايش تبغى😂و مثل طريقة عمل الشطه او المخلل الي بالصوره لها سنتين بجوالي محفوظه ولا سويتها 🫠 طيب ليه كذا
وبس يا أصدقاء هذي فئات الصور الي بجوالي لو بقسمها لمجموعات. طلعت حتى بالصور فيه عندي بعض النظام 😅 ما شاء الله. لان انا ماني شخص يحب يصور او يمسك جواله كثير فكون اني اطلع جوالي واصور شيء هذا معناته انه مره جذبني وشد انتباهي لدرجة ابغى اخليه ذكرى عندي. وجاني فضول اعرف انتم ايش موجود بمجلد صوركم ؟
المهم خليني احكي لكم على السريع سبب غيابي هذي الفتره ، صراحه كنت تعبانة (زكام) تخيلوا بعد أسبوع العيد على طول سبحان الله وكنت ماني قادره اسوي أي شيء بعدها حسيت بتحسن يومين وقلت الحمدلله خلاص انا تشافيت . وسبحان الله بعدها بيوم وارجع امرض من جديد جتني صدمه كيف كذا 😪 وابحث بقوقل عن الامر وطلع ان انا ما تشافيت بس خف المرض وانا استعجلت احسب تحسنت 🥹. وهذا الأسبوع الحمدلله بديت استرجع صحتي بالتدريج وابغى اكتب وانشر مثل قبل بس مابغى اضغط على نفسي ، لأني لسى بمرحلة التشافي
أيضاً لاحظت شيء الزيارات مرتفعة ما شاء الله والي مفاجأني انه من الصين وهونك كونغ انا مصدومة يعني هل الصينيين فعلا يتابعوني او عرب ساكنين هناك . انا مستغربه لأني من السعودية ومن لما فتحت الموقع اعلى نسبة زياره بموقعي هي من السعودية وأيضا المواضيع الأكثر قراءه هي باللغة العربية فكون ان اعلى نسبة زياره من دول اجنبيه هذا شيء غريب 🤯 بس اختي قالت لي ممكن يستخدمون برامج ترجمه قلت صح احتمال صحيح كيف غاب عن بالي 🫣. بكل الأحوال من وين ماكنتم تنورون موقعي واشكركم على الزيارة ❤️وأتمنى محتواي يعجبكم شكراً كثير لكم❤️
❤️أتمنى تكونوا انبسطتوا اليوم بالقراءة، وأتمنى لكم ليلة سعيدة ومريحة
