كيف اوفر فلوسي-الجزء الثاني/معتقد المال

اهلاً يا أصدقاء.. اليوم بشارك معكم قصتي مع معتقد المال

 لأني مريت زمان بمواقف وتجارب صعبه من ناحيته لدرجة إني بنيت معتقدات خاطئة عنه. لكن قبل أي شيء حابه انوه 🚨 ان هذة تجربتي الشخصية بالكامل و ليس لدي خبره او شهادة بلمجال المالي او النفسي أو أي شيء مختص بهذا المجالات

نظرتي السابقة للمال

انا ماني غنية او فقيره لدرجة اني ما املك شيء لا الحمدلله ولكن فيه أشياء ماكنت اقدر اجيبها بسهوله. عشت أيام مؤلمة وانحطيت بمواقف سيئة بسبب الفلوس فخلاني ابني أفكار ان الفلوس صعبه الواحد يجيبها، بعدها بنيت معتقد انها تذل وتهين، بعدها انها سلبت متعتي وسعادتي في الحياة. من غير تولد عندي خوف إني اصحى من النوم وما احصلها. الى ان الحمدلله من بعد جهد توظفت فبديت احس بالاستقرار المادي وصرت اشتري الي ابغاه الحمدلله. لكن كان فيه شعور بداخلي الي هو الخوف من المستقبل من ناحية المادة ابغى أأمن نفسي وما اصرف خوفي ان فلوسي تنقص واحتاج واضطر اطلب من احد واهين نفسي

طبعاً الموضوع مو موضوع مال وبس وصل الامر بسبب المعتقدات السلبيه احس بشعور اني عاله وهذا ابتداء من عمر صغير وكان متعبني مره. وبسبب هذا كله صرت ما عرف اطلب المساعدة من احد واي شيء يصير لي انا المفروض احله بنفسي مو مشكلة احد. وايضاً اذا اي وحده تقدم لي شيء مادي هديه مثلاً احس بالإهانة بالمعنى الحرفي، كيف تهينيني وتجبلي هديه مشاعري تنجرح واحس اني بلا كرامه ومكسورة وذليله. فكنت أكره اتعرف على احد عشان ما تهديني بس انا عادي اهدي شيء غريب

ما علينا فيه حاجه كنت الحظها زمان، لما كنت في الجامعة او متوظفه ان زميلاتي جميعهم ما عندهم الرعب الي عندي من ناحية المال يعني كنت اشوفهم واسمعهم يتكلمون عن المال بشكل طبيعي ما شاء الله وحتى ما يخافون انهم يصرفون. فمره سألت وحده فيهم ايش احلامك في المستقبل جلست تعدد لي اشياء بعيده جداً عنه وانا كنت مستعجبه 😧 لدرجة اني سألتها انتي ما تفكرين تأمنين نفسك ببيت بالمستقبل جلست تضحك قالت ايوه اكيد . بس اجابتها كانت كأنه شيء ثانوي بالنسبة لها مو شيء أساسي نفسي انا

المهم بعدها فكرت اترك الوظيفة وافتح الموقع وقبل ما تركها عرفت اني اقدر ادخل مدخول شهري طيب ما شاء الله من الموقع فكنت ما شاء الله مبسوطة اني رح اشتغل الشغل الي احبه وبنفس الوقت اكسب فلوس من وراه واستقر مادياً. وفعلاً بديت أحاول اشغل الموقع ما ضبط الامر أكثر من مره، انا هنا دب الرعب في قلبي من جديد ورجعت أخاف مثل قبل وأفكر كثير واحس اني ثقيلة. فقررت بفتره ارجع اتوظف عشان الخوف يروح بس سبحان الله ما تيسر الموضوع

وبيوم صار الي كنت خائفة منه انقطع مصدر دخلي الأول انا انصدمت بس ما خافت! 🤔 مثل ما كنت أفكر قبل ما عرف ليه. قلت خيره الحمدلله وبعدها صار الموقف الي كتبت لكم عنه ان الفلوس الي سلفتها لوحده رجعتها لي بهذا التوقيت وكان السبب من بعد الله بتغيير المعتقد المالي عندي

ما هو المعتقد او الاعتقاد؟

هو حكم ذهني جازم لايقبل الشك لدى صاحبة ويتكون من مجموعة أفكار ومبادئ يلتزم بها الشخص وهو أساس تصرفات الفرد ومعتقداته وممكن يكون صح او خطاء

:كيف عالجة المعتقدات السلبية عن المال

مثل ما كتبت لكم بسبب هذا الموقف خلاني اجلس مع نفسي واعالج نفسي بمرحلتين

المرحلة الأولى: البحث في المعتقد المالي

١-جبت ورقة وقلم وكتبت انا كيف انظر للفلوس، وأسباب نظرتي هذي والخبرات الي صارت لي فيها كلها كتبتها من الصغر الى عمر الثلاثين

٢-عرفت ان هذا يسمى معتقد سلبي من ناحية المال بسبب المواقف الماضية

٣-هديت من نفسي ومن الأفكار السلبية، وتنفست كذا مره

٤-بحثت عن الرزق من الناحية الدينية من وين يجينا وكيف يجينا

٥-عرفت من بحثي عن الرزق ان الله هو صاحب الرزق الأوحد في هذي الأرض. يعني لو سعيتي وسويتي كل شيء اذا الله مو رايد انك تأخذين فلوس من هذا المكان مارح تخذينه

٦-فيه جمله يقولونها دائما ان الطفل يولد ومعه رزقه بكل امانه ماكنت افهم هذي الجملة زمان. بس فهمتها بهذيك الفترة، تعني ان الله متكفل برزقي طول ما انا اتنفس الى ان اموت

٧-التعامل مع الفلوس بذكاء وما اتعلق فيها، اعاملها نفس صاحبي وقت المصلحة بس أكون حذره منها لأنها ممكن تغدر فيني. يعني حطي حدود وخطوط حمراء ما تتجاوزينها مع الفلوس مثلاً إنك ما تسمحين انها تهينك

٨-بما ان الفلوس ذكيه وممكن تضيعني اذا ما ركزت معها فلازم يكون عندي مبادئ وقيم عشان تحميني منها

المرحلة الثانية: تغيير المعتقد من سلبي الى إيجابي

١-جبت المعتقدات السلبية الي كتبتها لكم وحطيت مكانها معتقد إيجابي. على سبيل المثال معتقد سلبي الفلوس سبب بتعاستي- معتقد إيجابي انا سعيدة بفلوس ومن غيرها. معتقد سلبي انا خائفة اني اصحى ومايكون عندي فلوس- معتقد إيجابي ان الله هو الرزاق ذو القوة المتين

٢-غيرت معتقد شعور العالة والذل ان هذا رزقي من الله يعني ان أي فلوس تجيني بالحلال من أي بشر على وجه الارض هذي رزقتي من الله مباشره فهذا الشخص يكون سبب فقط ان رزقي يجي عن طريقة

٣-غيرت معتقد الهدايا إني صرت بالتدريج اتقبل ان احد يهديني وصرت انبسط وابين مشاعر الامتنان. ان ما فيه شيء شخصي وهذا شيء لطيف وجميل ان شخص يهديني معناته انه مقدرني او ان هذي هي طريقة تعبيره لي

٤-سويت جدول للميزانية اصرف، اشتري وادخر بذكاء

٥-الحمدلله انا من زمان احمد الله على الرزق بس بخوف، لكن صرت اقولها الان بامتنان وشكر لله على نعمته وستره علي

٦-جلست ادقق بكل موقف سابق سلبي صار لي مع المال وعرفت انها كانت لمصلحتي يا اما درس تعلمته ، او خيره عشان ابعد عن شر بيصير لي، او ابتلاء من الله عشان اثق فيه والجئ له

٧- اثق بالله ان رزقي رح يجيني وان الرزق الي بيدي الان هو مناسب لي بهذي الفترة

٨-انا ادعي يكون عندي بيت وسيارة بس اعرف ان الله رح يرزقني إياهم بالوقت المحدد بالنسبة له

٩-موضوع الكسب المادي من الموقع مؤجل لحكمه من الله وانا راضيه بحكمته. الى ان يجي هذا الوقت انبسطي بالكتابة وعامليه كاهواية

١٠-ارضا برزقي كيف ما كان، يعني هذي الخصلة فيني من انا وصغيره ما شاء الله اني راضيه بإي مبلغ يكون معي وأقول الحمدلله ولا اتذمر. لدرجة ان الناس الي مرو علي بحياتي يحسبون اني غنيه مادياً، لإني ما اشتكي ولا ابين وضعي المادي الحقيقي وايش امر فيه. بس الموضوع موضوع تعفف ،عزت نفس،كرامه ورضا لا أكثر ولا اقل

١١-اذا بطبقون هذي الخطوات لازم تكونون صبورين على أنفسكم

 عشان تتغير لأنها تكون محفوره بعقلكم من سنين ومبنيه على تجارب . يعني شيء فعلاً صار فتغييرها يحتاج منكم ايمان بالله، دعاء ،صبر وثقه بأنفسكم

ملخص تجربتي

الجزء الأول من السلسلة ذكرت لكم كيف اضبط الميزانية، لكن ما ذكرت لكم السبب الرئيسي وراء تنظيمها من الأساس. حبيت أشارك معكم تجربتي الشخصية لأني أحس ان فيه كثير منكم قاعد يمر فيها او حصله مثلها من قبل وممكن كلامي يساعده بتشافي وتغيير حياته المالية للأفضل. اتمنى أكون افدتكم واني ساعدتكم بتغيير معتقداتكم السلبية من ناحية المال

شكراً لكم على القراءة واتمنى لكم ليلة سعيدة ومريحة ❤️