الخوف من التغيير

تنبيه مهم🚨

انا لست أخصائية نفسيه او عندي شهاده من هذا القبيل ولكن هذه كلها تجربتي الشخصية

لما كان عمري ٢٥ سنه مريت بحالة اكتئاب شديده، اسبابه كانت كثيره ولكن واحد منها كان خوفي من التغيير . بدأت القصة قبلها بسنه لما تخرجت من الجامعة كنت متحمسة ومبسوطة اني خلصت دراسة بعد ١٧ سنه جهد وتعب. قررت اني اخذ ستة شهور راحه اعيش حياتي بحريه بعد الضغط والانضباط. انام متى ما ابغى اصحى بالوقت الي يعجبني ما عندي بحث أسويه او اختبار استعد له. وقلت بعد المدة هذي رح اشوف ايش بسوي بحياتي بإذن الله

الي صار إني بعد ما مرت الشهور حسيت ان جاء الوقت الي ابداء اغير حياتي فيه واتوظف. لكن كنت خائفة من إني اتخلى عن روتيني واتغير. وبنفس هذيك الفترة مريت بظروف جداً صعبه ومؤلمة فخلتني ادخل باكتئاب شديد. فكنت جوأة دائرة سوداء ماعرف كيف اطلع منها او اتخطاها. فلقيت حل يواسيني ويخليني أنسى الي انا امر فيه والي أخاف منه، الي هو الخيال

كان كل شيء لي في هذاك الوقت اتخيل اني سعيدة اتخيل اني بصحه اتخيل اني محققه احلامي الى ان وصلت اني اتخيل وانا أتكلم مع الناس وانا اسوي مهامي. ماكنت قادره أوقفه مره مريحني وخلاني اتمسك بالخوف أكثر لأن كانت الخيالات تفوق توقعاتي. بمعنى لو أنجزت شيء ابغى على طول اشوف نتيجته مثل خيالي اتحكم فيه وبسرعة اشوف الخلاصة. كنت رافضه واقعي رفض قطعي ولا شيء فيه مريحني وامقته حد الموت والخيال المنقذ. لأني خائفة اني اواجه الحياة والناس ولأني ايضاً خائفة من الأذية والشعور بالألم اكثر من الي احس فيه

تنويه هذه الفقره تحتوي على معلومات علمية حصلت عليها من خلال البحث💡

ماهو الهروب الى الخيال؟

هي تقنية حماية ذاتية، تستعمل من طرف الناجين من سوء المعاملة بكثرة. وهي طريقة انسحاب عقلية او شعورية للاندماج في عالم خيالي مما يؤدي لتخدير ذاتي عن طريق التنفيس عن الألم الحالي. تتميز بخصائص إدمانيه وقهرية، يصعب على الأشخاص التخلي عنها

ماهي أسبابه؟

١-الصدمات المعقده: تأتي لما يعيش الشخص في احداث مؤلمه ولا يمكنه إصلاحها او حلها فيشعر انه مقيد، لذلك الدماغ يحاول انه يبحث عن حل حتى يطلعه من حياته البائسة المعقدة فيحاول انه يفصله عنها بالخيال

٢-شكل الخيال: المكان الي يهربون فيه يكون امن وسعيد. الكل يحبهم ويعاملهم باحترام، وكل احتياجاته موجودة وعنده قوه وسيطرة كبيره على حاله وحياته

٣-حالات العنف الشديد: في هذه الحالات يضطر العقل الى فصل الشخص من واقعه بشكل لا ارادي لحمايته

٤-التمني: فالخيال تحدث عملية الاحتواء ان الشخص يتمنى الاشياء الي يتوقع انها حل لمشاكله. مثلاً انه يتخيل لو ان عنده سيارة عشان يقدر يتوظف

٥- العار: يهرب للحاجة للتقدير والاحترام وانه يشوف نفسه بأعلى مكانه

٦-الاحتياج: الخيال يوفرله الاحتياجات الي هو محروم منها مثل الانتقام، العدل، الحب، التقدير، الانتماء والتواصل

٧-الرضا الداخلي: الخيال يحاول يسيطر على الأفكار السلبية باستبدالها بأفكار ايجابيه للشعور بالرضا الداخلي ولكن لفتره قصيره للأسف

هناك نوعان للخيالات صحي والغير صحي

الغير صحي

١-يكون خطر لما يتعارض مع قدرتنا في اتخاذ القرار وتحمل مسؤولية حياتنا. وأيضا عند التعامل مع مشاكلنا وقدرتنا على تحمل نتائج افعالنا

٢-عندما نحاول بشكل مزمن نستبدل الحقائق الى مشاعر. يعني نخلي مشاعرنا تسيطر علينا وتعمي عيوننا عن الحقيقة. مثال عني اني كنت اعرف ان حياتي فيها مشاكل ويبغالها حل وهذا مسبب لي خوف بس كنت أحاول اسيطر عليه بالخيال وانكره بمشاعر فرح بخيالي

٣-تفضيل الانكار، الانفصال عن الواقع والتجنب

الصحي

١-تخيل عالم اخر عن الواقع هذا طبيعي عندنا كلنا. لأننا من عمر صغير نبدأ نتخيل عالم اخر نلعب فيه ونشتري العاب و نمارس وظيفة احلامنا

٢-التخطيط للمستقبل والامنيات

٣-يكون صحي في إدارة الصعوبات الذاتية، مثل معالجة الاكتئاب وخيبة الأمل. ان تحفز نفسك بان هذي فتره وتعدي ورح تتخطى الصعوبات بإذن الله

 خوفي من فتح الموقع

خليني احكي لكم قصتي مع خوفي من فتح الموقع. كانت امنيتي من عمري ١٧ سنه ان يكون عندي موقع واكتب فيه. كنت أفكر كثير فيه بفترة الاكتئاب هذي، لكن اقول مارح اقدر افتحه وان الامر مستحيل ليه؟ لان ما عندي فلوس 😥وهذا كان عذري رغم اني اعرف ان الحل هو الوظيفه . بس كنت احس بالخًوف من موضوع العمل لاسباب كثيره ومن ضمنها ان ما عندي ثقه بنفسي و مخاوف كثيره جداً، فقول خلاص مو وقته واروح للخيال واتخيل اني فتحت الموقع من غير جهد وتعب. الى ان قلت خلاص الى متى تهربين من الشيء انتي تبغينه لازم تواجهين الحقيقة و تتقبلين الواقع

 فاول شيء لازم احل مشكلة الخوف من الوظيفة وفعلاً بديت اقراء كتب و لجأت لله وصرت استغفر وادعي بنيت اني اتوظف رغم اني كنت متوتره وخايفه ان مخاوفي تكون صح وما عندي ضمان ان يكون العكس. بس كملت والحمدلله اشتغلت واكتشفت ان فعلاً مخاوفي الكثيره مالها اساس من الصحه الحمدلله 😅 الا استفدت وتعلمت وتغيرت فيني اشياء كثيره بسببها الحمدلله. المهم بعدها جمعت فلوس للموقع وفكرت هل رح استمر فيها وابداء بالموقع  بنفس الوقت او لا، حسيت اني مارح اقدر اوفق مابينهم خاصه ان الموقع حلمي وابغى احط انتباهي ومجهودي له .فتركت الوظيفه وسبحان الله كان قرار صائب لأني اكتشفت موخراً ان الشخص العالي الحساسيه القرارت الكبيره مثل وظيفه، نقل من مكان لأخر، زواج و خلفه يعني اي خطوه كبيره بحياته تسبب له توتر وقلق مو طبيعي. خاصه اذا سواهم كلهم مع بعض هذا كثير على جهازه العصبي وممكن ينهار عكس الشخص العادي ممكن يسوي كل هذا بنفس الوقت يدرس ويتزوج ويروح لدوامه ويفتح مشروع عادي صحيح يحس بضغط بس حياته تمشي. لكن لو انا او اي شخص نفس نمط شخصيتي مارح يقدر يسوي كل ذا لانه مجهود كبير على عقله. طيب هل يوقف حياته معناته كذا؟ لا بس لازم ندرج بالتغيير يعني ما نصدم أنفسنا بكذا مشروع وتغيير كبير بنفس الوقت، بمعنى اننا نركز على مشروع مشروع مو كلها مع بعض 

ماعلينا بوقت اخر باذن الله رح اشرحلكم عن نمط شخصيتي، لكن خليني الان اكملكم قصة الموقع😅. الي صار اني تركت الوظيفة وصار عندي ثقه بنفسي بس لسى عندي مخاوف من فتح الموقع بس بعد تجربة العمل عرفت ان الموضوع أفكار سلبيه براسي وبس. فعزمت إني اواجهها وبما ان الحين صار معي فلوس صار مافي حجه اني افتحه الان🤔 صح! المهم إني دخلت دورات بالكتابه الأبداعيه لاني ما اعرف اكتب غير كتابة اكاديمية، بعدها اخذت دورات بفتح الموقع والتسويق والتخطيط و الاشياء التقنيه المختصه فيه بشكل عام. وبداءت بشويش انشاءه واخذ الانشاء تقريباً سنتين او ثلاث لان كانت ظروفي النفسيه صعبه بس كنت صابره وعارفه ان هذا طبيعي لان هذي الحياة عكس قبل كنت رح اهرب للخيال عشان اوصل للنتيجة النهائية واتخطى مراحل الجهد والتعب. بس بعدها بدأت اكتب وانشر و سبحان الله كل المخاوف الي كنت افكر فيها ماصارت ابدا يعني من ضمنها اني كنت خايفه من التعليقات السلبيه وسبحان الحين رح اكمل تقريباً ٣ سنين بشهر شعبان وانا اكتب محتوى والى يومكم هذا ما شفت تعليق سلبي على مقالاتي اصلا ما فيه تعليقات تجيني 😂. والزيارات ما توصل ٢٠٠ بشهرين مع بعض يعني لو كثرة مره ١٧٠ يعتبر مره قليل 

على أي حال، الي صارلي بالعشرين يعتبر خوف متراكم ومتشعب يعني مثل مانقول شيء يجر شيء. واجهت مخاوفي الأساسيه عشان أقدر احقق امنيتي الي احلم فيها. كان من الضروري المواجهة والتعب عشان اوصل للنتيجة هذي. وسبحان الله التعب جداً ممتع لأن النهاية مرضيه الحمدالله. انا احياناً قبل ما انام أحب افتح الموقع واجلس اتأمله واقرأ مواضيعي وأحس بفخر، واقول سبحان الله كيف كنت احلم فيه بعمر ١٧ وكنت اتخيله وخايفه من مواجهته بعمر العشرين. وان الحمدلله انجزت الى ان وصلت لهذي النتيجة الحمدلله🥹❤️❤️❤️ والشكر لله طبعاً

كيف تغلبت على الخوف

انا زمان سويت كذا خطوة والان بهذا الوقت عندي حلول اضافيه عليهم فارح اجمعهم مع بعض في نقاط واحده

١-علاقتك بالله: لو بنصح بشيء بنصح انك تلجئين لله أولاً قبل ما تسوين اي شيء او تلجئين لأي مخلوق. حاولي انك تقربين منه وتكلمينه و تطلبين منه الراحة بحب مو لأنك خائفة منه. حنا نعبد الله ونخاف من عذابه بس ترى نقدر نتكلم معه باي حاله كنا فيها مو شرط عشان نصلي، نصوم او ندعي او نكون بمصيبه هو موجود طول الوقت ويسمعك كلميه باي شيء يخطر ببالك اطلبي منه يطلعك من الحيرة والألم هذا وراح يساعدك بس اصبري وثقي انه جنبك

٢-العلاج النفسي: اذا عندك القدرة المادية انك تستشيري دكتور نفسي ليش لا بس حاولي انك تختارين بعناية لان للأسف مو الكل يقوم بشغله صح

٣-العلاج الذاتي: اذا ماكنتي مرتاحة انك تروحين لدكتور وحابه تعالجين نفسك بنفسك رح انصحك تتبعين هذي الخطوات

١- إيقاف الخيال: اول شي تسوينه توقفين الخيال الغيرصحي هذا لأنه اول بدايت العلاج

٢-المحاولاة: الخيال الغير صحي قوته لا يستهان بها خاصه لو كنتي تمارسينه لسنين فعشان كذا اذا عقلك خلاك تتخيلين غصب عنك على طول ارجعي للواقع وقولي هذا مو حقيقه وانا قويه ورح احل مشاكلي واتقبل واقعي

٣-المواجهه: انتي تهربين من الواقع بسبب الخوف من مواجهة مشاكله وصعوباته. لا تخافين واجهيها لان لمتى الهروب نهايتك رح تواجهينها بالنهاية لكن لما تسوينها وانتي مستعده رح يكون اقل وقعاً على نفسك لما تكونين مجبره

٤-علاج المخاوف: اجلسي مع نفسك وجيبي دفتر وخلي هذا الدفتر لحل مشكلاتك ومواجهة مخاوفك اجلسي افهمي أسباب خوفك من التغيير يعني حللي السبب من هذا كله ممكن احد محطمك او احاسيس داخليه مالها أساس او ممكن شيء نفسي ولما تعرفين يصير تقدرين تعالجينه حبه حبه وتتخلصين من الخوف نهائياً

٥-تفريغ المشاعر: لما تحسين بخوف او قلق او ارتباك وتحسين انك تبغين تلجئين للخيال عشان تحسين براحه ارفضي هذي المشاعر ولا تكبتينها بعد. طيب ايش تسوين؟ دوري لك طريقه تفرغين فيها مشاعرك مثلاً تتكلمين مع احد تثقين فيه، تصلين وتحكين لله كل شيء صار وتطلبين منه المساعدة ، الأستغفار كمان يساعد كثير ، او جيبي دفتر اكتبي فيه او اطبخي ، امشي ، لوني يعني سوي اي هواية طلع الطاقة هذي وتريحك نفسياً . بس المهم سيطري على عقلك عشان ما يروح للخيال غير الصحي بهذا الوقت

٦-التقبل: تقبلي واقعك لأن الرفض مارح يفيدك خلاص هذي الحقيقة واجهيها لأن الاستمرار في دائرة الخوف رح يتعبك. وما يخليك تتقدمين الا رح تظلين سنين نفس ما انتي ولما تتشافين تقعدين تندمين على الوقت والعمر الي راح بالخوف

٧-الجلد: لا تجلدين نفسك لأنك بهذا الوضع ترى فيه ناس مثلك كثير اهدي وارتاحي

٨-القرأة: انا وقتها قراة ثلاثة كتب ومن بعد الله ساعدوني اني اتخطى هذيك المرحلة مع الخطوات هذي طبعاً. كتاب من حرك قطعة الجبن الخاصة بي ، كتاب السماح بالرحيل و كتاب لماذا نرتكب الأخطاء لخصتهم من قبل هنا. حسيتهم بسطوا الامر علي وان كلنا نغلط ونخطي، والتغيير مهم وضروري ومطلوب بحياتنا

٩-الأنبساط: انا ليش كنت خائفة من التغيير لأني كنت احسه الزامي ومزعج ومؤلم، بس لما بديت اعالج بعض المخاوف اكتشفت اني اقدر اتغير وانا مبسوطة اقدر اخوض تجربه وانا سعيدة حتى لو ما نجحت وحتى لو كانت صعبه عادي انبسط و ارضا فيها

١٠-الحقيقه: بقولك شيء عن تجربه ان أي خوف نحس فيه هو مجرد أفكار بالغالب مالها أساس من الصحة، عقلنا كونها نتيجة خبراتنا السابقة وتعاملاتنا مع الناس. فنخاف اننا نرتكب نفس الغلطة، بس لما تكسرين حاجز الخوف يطلع كله أفكار تعبتك على الفاضي وبس

١١ـالتنفس: حاولي تتنفسين نفس عميق يومياً هذا ساعدني اني اتغلب على نوبات التوتر والقلق اني انظم تنفسي. احب اتنفس اربع مرات كذا اول ما اصحى من النوم ويصير ابداء يومي بهدوء وتنفسي منتظم. وبكل امانه بفضل الله ثم التنفس تخلصت من نوبات الخوف والقلق

١٢-الثقه بالنفس: قوي ثقتك بنفسك، حبيها، احتويها، تعرفي عليها واهتمي بصحتك النفسية العقلية والجسدية. كل هذي الأشياء ترى تساعدك أنك تتغلبين على مخاوفك ، حتى لو خطرت لك أفكار سلبيه بإمر ما تقولين لا انا اعرف نفسي ومتأكدة رح انجح بإذن الله. وفيه شغله ثانيه ترى ما حد يعرف ايش بداخلك غير نفسك يعني مافي شخص يعرف أنك خائفة ومتوترة غيرك لا تشيلين هم أحد

١٣-الايجابيه: قولي لنفسك كلام إيجابي طول الوقت حتى لو بهذي الفترة مارح تصدقينه لأنك محاطه بأفكار سلبيه بس استمري عليه الى ان تحسين انك مؤمنه فيها وفعلاً تشوفين انه حقيقه. قولي انا قوية وانا اقدر ورح تفرج بإذن الله

١٤-الناس المؤذية: ابتعدي عن أي شخص سلبي ومؤذي بهذا الوقت حافظي على هدؤك الداخلي بالوقت الحالي عشان تركزين على نفسك اكثر. ولا تشاركين خطواتك هذي مع احد خليها سر عشان بإذن الله تتم على خير

١٥-تغيير جو: حاولي تغيرين جو ما بين الفترة والثانية لو تقدرين تسوين نشاطات تغيرين فيها روتينك او تروحين حديقة او تطلعين مع صديقاتك او خواتك بس المهم اطلعي من جو الخوف هذا ولا تجلسين معه لفتره طويله

١٦-الانشغال: اشغلي نفسك بشيء لا تجلسين فاضيه عشان ما تفكرين بالمخاوف كثير

نصيحة من القلب❤️

التغيير ما يخوف ابداً بالعكس الا جميل ومفيد لحياتنا. لما تتغلبين عليه وتشوفين قد ايش انه غيرك للأفضل رح تتحمسين انك تستمرين بالتحسن والتطور. وتبدأين تبحثين عن طرق تساعدك تقوين جوانب الضعف فيك وتواجهين الحياة والواقع. انا لما تغلبت على الخوف حسيت بشيء من الندم قلت لنفسي ياريتني واجهت الخوف من بدري وكسبت وقت راح من حياتي كان حالي مختلف عن الأن. لكن بعدها قلت لنفسي لا هذا قدر من الله انه خلاني امر بكل هذا، لحكمه ولتوقيت معين وفعلًا سبحان الله لو ما مريت بكل المشاكل والعقبات الي زمان كان ما نضجت وماقدرت اكتب لكم اليوم قصتي 🥹 الحمدلله

طيب انا حالياً بعد ما تغلبت على المخاوف والخيال الغير صحي، صرت اتخيل خيال صحي اني احقق احلامي واني اشجع نفسي واعطي نفسي امل بالتغيير الإيجابي. يعني انصحك ما تستعملينه الا بعد ما تعالجين الخوف وتكونين أحسن. أيضاً لما احس بخوف من شيء أقول لنفسي ان هذي أفكار سلبيه والحقيقة مارح يصير شيء، وافرغ الي جواتي بالورق واتنفس كثير. وإذا حسيت ان لسى فيه خوف اروح ادعي الله على طول وارتاح. فالنهاية انصحك ياقلبي انتي إنك ترمين حمولك على الله ولاترتعبين من شيء انتي بس اهدي ياعمري☺️ وركزي وعالجي مخاوفك وحده وحده مو كلها مع بعض رح تشوفين التحسن بحياتك ان شاء الله

اتمنى تكونون بخير وصحه ❤️ والله يبعد عنكم أي خوف واي شر بإذن الله