مذكرات رمضان ٤٧ الجزء الأول-بداية خير

لسنوات وسنوات

وأنا أبحث عن رضا ذاتي وسلام داخلي

ظننته خطأً كامناً فيما هو آتٍ

ناسياً نِعماً لا حصر لها تتجدد معي كل صباح

إسلام جمال -

أهلاً يا أصدقاء.. هذي أول تدوينة من سلسلة مذكرات رمضان . السنه الماضية ماكنت متفاعلة في الموقع مثل ألان فوقتها شاركت معكم ملخص رمضان وأيش سويت كل اسبوع . هذي المره بشارك معكم ملخص كل اسبوع بيوم الجمعة بإذن الله. حابه أن تكون نفس الدردشه او السوالف مو شيء رسمي





اليوم الأول

طيب خلوني ابداء بليلة رمضان تخيلوا كنت قاعده اطلع الزينه من تحت السرير وفجأة كذا الخشبة حقته طاحت علي وضربتني على خدي اليمين وانا خلاص خنقتني العبره حسيت نفسي لو ارجع صغيره بهذي اللحظه عشان اصيح🤣بس اضطريت ابلعها واقول عيب ياسامية انتي كبيره اسكتي وتحملي الألم . بس الحمدلله جت سليمة وماصار لعيوني شيء ولا فيني كدمات الحمدلله بس بوجع في خدي فضل كم يوم بس الحمدلله خف

ماعلينا اول يوم جاء و كان الصيام ماشاء الله خفيف والعبادات الحمدلله ميسره ماشاء الله ، والشيء الثاني ان الحمدلله المشاعر الي تصير لي كل اول يوم برمضان ماجاتني و كنت نفسياً اقوي ماشاء الله.صحيح نفسي اسألكم هل انتم من الناس الي عندها طقوس على السفره او لا؟ يعني اسمع ان فيه ناس ماتعرف تجلس على السفره اذا مافيه سمبوسه او مافيه شربه، وفيه ناس اذا مافيه فيمتو. انا عن نفسي ماعندي الحمدلله لاني في رمضان وغيره اكل واشرب لحالي وماعندي طقوس اصلا😅.يعني هذي من افضل القرارات الي اتخذتها بحياتي من سنين وهي العزله

ولا لي في جمعات ولا لمات ولا مناسبات ولا حتى عزايم في رمضان ابداً مالي بوجع الراس. انا ماني مرتاحه بالدنيا فجاني شعور انه لاراحة فيها ولا من الناس فقررت اني اعتزلهم على الأقل ترتاح نفسيتي والحمدلله افضل شيء سويته.احكي لكم حاجه طريفه فيه وحده مره قالت لي انتي كيف بتتزوجين وانتي حابسه نفسك لاتروحين مناسبات ولا تختلطين بالعالم وطبعاً للعلم هي نفسها لما قصيت شعري قالت لي جمله مشابهه😙 مشغوله انها تزوجني اكثر مني ماشاء الله😂. ماعلينا قلت لها موهامني الله اذا اراد رح يجيب لي رزقي لو انا في صحراء نائيه. والمشكله اني اعرف بنات ماشاء الله عليهم مايخلون مناسبه الا يروحون لها والكل يعرفهم بس سبحان الله ماتزوجوا. يعني ايش الفكر القديم المحدود هذا اربط الرزق بشيء معين

المهم خلوني اكمل لكم ايش صار معي اول يوم ، طبعاً معروف انه مايكون فيه روتين لانه يكون ملخبط فكنت اسوي الي يخطر ببالي وبس ماتبع المخطط الاسبوعي. وعلى اخر الليل كذا اشتهيت قهوه سوداء بارده ليش بالتحديد؟ لان قبلها بيوم كنت قاعده اتابع مسلسل كوري وشفتهم بالمقهى يشربونها اشتهيتها مره ماشاء الله ،فطلبت من اختي تسويها لي ماشاء الله ماشاء الله كانت مره لذيذه. شربتها من غير ما احس الله يعطيها العافيه الذ قهوه سوداء ذقتها في حياتي ماشاء الله

اليوم الثاني

اليوم الثاني جاء قررت اني افكر ايش ابغى اسوي غير العبادات طبعاً مثلا هوايه عشان مابغى اجلس فاضيه فجاء ببالي ابداء اقراء كتاب لكنود للأخر ولحد الأن عاجبني. من غير فكرت هل اكتب اول لا فقلت ليش لا فجلست اخطط انا ايش ابغى اكتب ليوم الاثنين .بس ماكتبت لان كان عندي الم في ظهري فضيع ومعكر مزاجي عادا اني كنت مرهقه بس نفسي انام ماشاء الله ماعرف ليه. طيب انتم ممكن تسألون هل تتابعين مسلسلات في رمضان؟ الأجابه ايه ولا! انا عكس الناس اتابع كوري او هندي او انيمي بس المسلسلات العربيه لا ماحب لأنها ترفع ضغطي😡😅

اعطيكم مثال بهذا اليوم اختي كانت تتابع مسلسل ما وجلست اشوف بعض الاحداث، انا دمي احترق من الشخصيات النسائيه الي فيه.انا ليش تنرفزت لأنه للأسف الي يمثلونه صحيح وفيه نساء بالواقع كذا وهذا الشيء يضايقني ماحب اشوف امرأة مظلومة. يعني مثل فلم شفته قبل رمضان اسمه حق شد اعصابي مره ماتدرون قد ايش بس الي عجبني انها ماسكتت عن حقها والأجمل ان ابوها كان فعلاً سندها . وقدرت تنتصر بفضل الله بالنهاية، انا احب المرأة القوية الي تاخذ حقها باحترام وهدوء وماتتنازل ولا تستسلم عنه بسهوله. فشخصيات النساء الي بالمسلسل عندهم كل المقومات ان الوحده دافع عن حقوقها وتصحح غلطها بس عبث مصرين عليه 🫠😩 والي يغبن ان وحده فيهم هي حكيمة العايله وتنصح بعد

اليوم الي بعده

ماعلينا منهم خلونا ننتقل لليوم الي بعده بهذا اليوم انا كنت بردانه برد مو طبيعي مع ان الي حولي يقولون لي حر وانا مجمده🥶. يعني وقتها نمت بعد العشاء وكنت ارجف من البرد وانا نايمه، وابشركم لسى البس شتوي على فكره🤭 بس مو الثقيل. المهم بعدها حسيت اني مخنوقه وابغى اشم هواء نقي فمشيت ابو خمس دقايق في الشارع ورجعت البيت يارب لطفك😅 احس مالي خلق اسوي شيء برمضان هذا ولا حتى عندي الحماس بضغط او بمجاملة نفسي ماعرف حرفياً ابغى اتنفس وبس تعتقدون ايش سبب هذا الأمر وايش الي وصلني لهذي المرحله؟

اليوم الرابع

  هنا جلست اكتب مقال يوم الاثنين وانشغلت بالكتابه ، التحرير، العبادات والقراءة فكنت ماشاء الله مابغى اجلس فاضيه. سبحان الله لاحظت اني ما امسك جوالي كثير في رمضان هذا افضل شيء الحمدلله.بيومها اخر الليل بعد اشتهيت ام علي وقمت سويت لي، صراحه انا احبها مره بعيداً عن لذاذتها بس تخليني اكل مكسرات بانتظام ماشاء الله. احكي لكم شيء انا لما دخل الخريف صرت اسوي ام علي من غير الفطور الي كتبت لكم عنه وفيهم استخدم بذور اليقطين

لاحظت ان ماشاء الله فيه اختلاف بشعري وبشرتي، بالرغم اني موقفه حبوب الكولاجين وحبوب الشعر من السنه الي فاتت. فقلت ماشاء الله فيه شيء انا اسويه ومعطيني نتيجة ولما ركزت اكتشفت انه المكسرات بالتحديد بذور اليقطين وزبدة الفول السوداني لاني كنت اكلهم بانتظام ليا اشهر. ومن شهر كذا دخلت باقي المكسرات في نظامي فلما بحثت اكتشفت فوايد بذور اليقطين وزبدة الفول السوداني رائعين جداً للشعر خاصه بذور اليقطين . فصرت كل يوم اكل مكسرات ماشاء الله واركز على بذور اليقطين سواء سويت ام علي او لا

اليوم الخامس

بهذا اليوم حسيت ان صار عندي روتين يعني صرت اعرف ايش ابغى اسوي بيومي. صحيح نسيت اوريكم النوته حقتي ايش سويت فيها من تعديلات الي هي العبارات الي غيرتها. شوفوا انا وصلت لمرحلة حتى الفانوس الي مع العبارات لونته بقلم مالي نفس اقوم اجيب الألوان والون🥹😅 انقذوني من نفسي يابشر ماعرف ايش صاير فيني بس خير ان شاء الله.احب هذي النوته والكتابه فيها مريحه نفسياً ماشاء الله 

اليوم السادس

بهذا اليوم قررت اسوي فيه حلا لان ماسويت اول يوم اختي قالت بتسوي. احس في رمضان ماينفع اعمل كيك لانه وقت الحلويات الشرقيه والحلويات السريعه البارده ماعرف هل انتم كذا نفسي او لا؟ ورجعت عدت نفس مهامي اليوميه الحمدلله قراءة، تدوين وعدلت على البانر بالموقع وعبادات الحمدلله يارب على النعمه

أخر يوم بالأسبوع

في اليوم السابع كان عندي غسيل وتنظيف ومن غير كان نفسي اتغطى وانام وما اسوي شيء وحتى مشغله الدفايه لاني بردانه 🫠😪اهل المدينة يبكون بالزاويه ادري😂. بس ايش اسوي ماعرف ايش وضعي مع البروده هذي لاما عندي نقص فيتامينات الحمدلله وماشاء الله ليش؟لاني اعرف هذي المعلومة قبل ما اسمعها بفيديو ان سبحان الله الشعر مراية الصحه. بمعنى راقبي شعرك اذا شفتيه صحي اعرفي انه ماشاء الله صحتك تمام واذا شفتي فيه تقصف او تساقط اعرفي انه فيه خلل

وهذا زمان كان يصير معي كذا ، كان شعري يتساقط ومتقصف وحالته صعبه وكانت صحتي الجسديه والنفسيه بالحضيض الحمدلله (ولسى نفسياً ماني بخير الحمدلله على كل حال).لكن ماشاء الله الأن حبيبي صحي ماشاء الله ربي يحميه لي 😅شوفوا تعرفون الولد المفضل عند امه وابوه الي اخوانه وقرايبهم وجيرانهم وحتى قطط الحاره تعرف انه الولد المفضل عندهم. واذا سألوا اخوانه مين تحبون مننا اكثر يقولون نحبكم كلكم. وهم يعرفون مين بس مايبون يزعلونهم رغم معاملتهم تكشفهم😅.ايوه هذي انا مع شعري ولدي المفضل

انا احب اهتم بجسمي وكل شيء بس هو غير حب حياتي ربي يخليه لي😅🤣انا ماعرف ايش فيني قاعده اتظارف استحملوني معليش🫣. بكل امانه احس لحد الأن مرتاحه برمضان هذا ماشاء الله ممكن لأني ادعي من قبله يارب يكون خير وبركه وراحه علي اكيد هذا السبب.والحمدلله ماتعبت قبل دخوله وكنت متحمسه له كثير ممكن لأني تشافيت من الأشياء الماضيه ماشاء الله.يعني تعرفون احس كاني كنت بوظيفه من سنين وتقاعدت واحس ابغى ارتاح وبس هذا احساسي برمضان هذا الله يريح قلبي وقلبكم يارب

قولولي ايش رأيكم بسلسة المذكرات هذي عجبتكم او ارجع اسوي ملخص كامل نفس السنه الماضيه واشاركها معكم في شوال بإذن الله

♥️شكراً لكم على القراءة واتمنى لكم ليلة سعيده ومريحة