مذكرات رمضان ٤٧الجزء الرابع/وختامها مسك

(قُلْنَا لا تَخَفْ إِنَّكَ أَنْتَ الأَعْلَى )

لا تَخَفْ.. كانت خاطرة وحي لموسى -عليه السلام- حين أوجس في نفسه خيفة عندما ألقى سحرة فرعون حبالهم وعِصِيهم فُخيل إليه أنها تسعى، فجاءته تلك الخاطرة تطمئنه وتثبته. جعلته يصمد أمام واحد من أشد الطغاة في تاريخ البشرية، وكانت سبباً في تغيير حياة ملايين الأشخاص، فماذا لو أن النبي الكريم موسى -عليه السلام- استسلم لخوفه(حاشا لله) وكم من أمر كان سيغير حياتك لو جاءتك فيه فقط تلك الخاطرة" لا تخف"

أهلاً يا أصدقاء..  كيف حالكم وعيد سعيد عليكم، ان شاء الله اليوم رح أشارك معكم اخر تدوينة بمذكرات شهر رمضان المبارك. طبعاً انا تعودت انشرها بيوم الجمعة بس بما انه عيد فافيه استثناء. ما علينا مذكرات هذا الأسبوع  رح تكون عن اخر أسبوع  في رمضان كيف كان وكيف ختمته وكيف كانت تجربتي فيه هذي السنة

اليوم الثاني والعشرون

بهذا اليوم مانمت زين لأني صحيت على اتصال المندوب عشان استلم الكتب. رح اسوي لكم جوله سريعة عليها ايش رأيكم. اول كتاب هو تاريخ عن امارة العصفوريين انا طلبته لأني اول مره اسمع فيهم صراحه. خاصه انهم حكموا بدول الخليج فشدني هذا الشيء. كتاب روضة العقلاء ونزهة الفضلاء سمعت عنه زمان لكن من فتره شفت فيديو لشخص يتحدث عن اقتباس من الكتاب وجاني فضول اقراء المزيد واشتريته. رواية ونسيت أني امرأة للكاتب احسان عبد القدوس من زمان نفسي اقرأ له كتاب، فشفت ان مره وحده بطلب فبحثت في المكتبة عن كتب له وطلعت لي هذي الرواية. لفت نظري العنوان وملخص الرواية البسيط وحبيت اشتريه. اما الكتاب الرابع الغوه المكتبة والخامس قصة الأيمان شاركته معكم الأسبوع الي فات

اليوم الثالث والعشرون

كان يوم الخميس بس من بدايته وهو توتر، قلق وأفكار. ووقتها قررت اكتب تدوينة يوم الجمعة الي فاتت مع أني ماكنت مقرره بس حسيت بحاجه الهي عقلي بشيء ما ابغى افكر تعبت مره. فجلست اكتب واعدل الى الصباح. ورجعت كملت العصر الى اذان العشاء وخلصت الحمدلله. بعدها كان عندي تنظيف وغسيل كان يوم مرهق جداً 😪بس الحمدلله الامر الي سبب لي توتر ربي يسره والحمدلله الأمور عدت على خير شكراً يارب

وهذا أبو معلق الصحابي الورع، الذي كاد أن يقتله قاطع طريق ، فسأله أن يصلي لله ركعات قبل موته ، فتركه يُصليِ، فدعا بدعاء سُمِع له ضجة بين أهل السماء وقعقعة لأبوابها، لأنه كان مصاحباً لهم، فاستأذن مَلك من الملائكة أن يُغيثه فأغاثه بإذن من الله

اليوم الرابع والعشرون

اليوم كان ضغط وتعب وارهاق من بدايته لنهايته بس فقررت اجلس واخذ بريك عشان اشحن طاقتي فسويت لي قهوة. شوفوا احس بخجل اني توني اوريكم الكوب الي اشتريته لرمضان بعد ماخلص انا كارثه صح 😂. ماعلينا جلست اشرب قهوة واتابع مسلسل جنوب الهند هو عن قصة بنت انقتلت وبعدها الناس صاروا يطلعون اشاعات عليها انها بنت مشيها بطال وسمعتها مو كويسه وكلام من كذا بس لأنها كانت جميله. وبعد ما انحلت القضية صاروا يقذفون بشرف البنت والأم لان الي قتل البنت عشيق الأم. قصه محزنه مره لان البنت ماتت صرتوا تتكلمون عليها بذي الطريقة! لأنها ما تقدر تدافع عن نفسها شيء مؤلم . بس المسلسل اعطيه تقييم ١٠ من ١٠

اليوم الخامس والعشرون

كنت متوترة مره في اليوم هذا لأني بسوي كنافه 😅 بحكي لكم ليش. انا لما كان عمري ١٦ تقريباً سويت كنافه وكانت التجربة سيئه ، ومن بعدها قررت ما سويها ابد وافضل اجيبها من براء. المهم انا من فتره شفت ترند كنافه وخطر لي ليش ما أسويه خاصه انه سهل صراحه وبس اتبع التعليمات. اشتريت الكنافة من يومين بس ما قدرت اعملها لأني مثل ما كتبت لكم كنت تعبانه ومضغوطة. فقررت اسويها اليوم لكن مو على طريقة الترند لان ما عندي الصينيه المناسبه فبعملها بالطريقة التقليدية

ما تدرون قبل ما اسويها جلست اتفرج على فيديوهات الى الليل عشان تركز الطريقه ببالي وما افشل😅. وعرفت وقتها انا ايش غلطي زمان فيها ، أولاً الكنافة تحتاج سمنه او زبده كثير وانا قبل ما حطيت أصلاً ماده دهنيه 😩. ثانياً العجينة كانت كثير على الصينية ودهنتها بزيت وهذا غلط كمان🥲. ثالثاً الشيره او السيرب كان ما فيه حلاوة ناقص السكر فيه كثير. والي سويته الحين ضبطت كمية الكنافة او العجينة على الصينيه وقست بالميزان تخيلوا عشان أكون دقيقه😂. من غير حطيت كوب وربع سمنه على زبده في العجينة وحتى على الصينية حطيت ملعقتين كبار منهم يعني مو مسح مثل ما أسوي في الكيك. وفيه اضافه سويتها جديده وهي القشطة الكذابة وكانت تحفه ما شاء الله

الشيره ضبطت حلاوتها كانت ما شاء الله مضبوطه على الشعرة. وبس كانت النتيجة النهائية روعه ما شاء الله جتني صدمه انا مسويتها 🥰🫣مره لذيذة. السُمك مضبوط على الصينية والحشوة كانت اضافه ذكيه لأنها رفعت من جودت الكنافة ما شاء الله، خاصه طعم ماء الورد والفانيلا الي فيها فرق مره بالنكهه. افتخرت بنفسي مره 🥳 والحمدلله عرفت اخطائي وعدلتها وبعدها على طول رحت كتبت خطوات تحضير الكنافة، المقادير وملاحظاتي بالنوتة عشان ما انسى لأني بأذن الله رح ارجع اسويها مره ثانيه لكن هالمره بحشوه ثانيه ان شاء الله

اليوم السادس والعشرون

قررت اطلع عشان اروح الخياط واجيب أغراض من السوبر ماركت ويا ربي كان زحمه الشارع مره 😪. صرت ما حب اطلع بالزحمة ما دري ايش فيني وأحس بدوشه براسي وابغى اخلص شغلي وارجع على طول. المهم بعدها رجعت ورتبت الأغراض واخذت شور وقررت أسوي لي قهوه واتابع مسلسل جديد. هو جنوب الهند كمان 😅يتحدث عن شبح مرأة يسكن الغابه ويقوم بجرائم قتل بطريقه غريبه. طبعاً في الاخر طلع مو شبح ولاهم يحزنون بس مجموعه من سكان الغابه الأصليين كانوا ناشرين إشاعة الشبح عشان الناس تترك الغابه والحيوانات اجلكم الله بسلام

والناس الي قتلوهم ارتكبوا جرائم كثيره بحق الغابه والحيوانات اكرمكم الله. في البداية صراحه ماشدني بس قلت خليني اعطيه فرصه وكانت النهاية حلوه ما شاء الله، اعطيه ٩ من ١٠. احكي لكم شيء انا قررت اني ما انشر أسماء المسلسلات والأفلام الي اتابعها بعد كذا ما عرف هل أأثم او لا فقلت اقطع الشك من اليقين و أوقف انشر أسماء. بس ممكن اكتب عن القصص بشكل عام بدون ما اكتب أسماء او انشر صور

أصاب صديقي الهلع والقلق لأسابيع ليست بالقليلة،فالجريمة حدثت في بعد أمتار من شقته، وظن أنه كان هو المٌستهدف من السرقة لأنه يضع بعض الممتلكات النفيسة في خزانة شقته، من يُصدق أن تعيش في النرويج ولا تشعر بالأمان.. لكن أينما كنت لا أمان إلا مع الله

اليوم السابع والعشرون

طلعت للمرة الثانية للسوق ورحت للخياط، وطلع مضيع قماشي انا هنا تذكرت الحرمة المسكينة الي تقول "بكره العرس انا خلاص بنجلط "🥲. بس الحمدلله اختي جابته اليوم الثاني ما طلع ضايع 😅. المهم بعدها على الساعة ١ كذا اشتريت آيس كريم بالمانجو، تخيلوا كنا نسمع صوت من بداية الشهر ونحسبه سيارة اسعاف الله يبعد الشر. وأقول يا ربي لطفك ايش قاعد يصير بالحي ليش الناس صايرة تمرض كثير وبالأخر طلعت سيارة الآيس كريم شكراً على المقلب 😂

ما علينا تعبت نفسياً وحزنت بهذي الليلة لان رمضان خلاص انتهى اول مره احس بهذا الإحساس من سنين طويله. كان امنيتي من سنين أشعر فيه واغبط الناس الي يحسون كذا الى ان ربي اكرمني فيه بهذي السنه الحمدلله

قال أحد الصالحين: لو انطبقت السماء على الأرض لجعل الله للمتقين فتحات يخرجون منها، هو القائل سبحانه

اليوم الثامن والعشرون

كنت جالسه اسوي كم شغله باللاب توب والموقع بعدها قررت اسوي بانر العيد والحمدلله خلصت على خير. ولما جيت بنهي جلسة التطبيق الي استخدمه بتعديل الصور شفت مجلد صور فيه لوحة امنياتي الي من سنتين .تخيلوا حزنت وجاتني غصه بقلبي، لأن سبحان الله ولا شيء فيها تحقق ولا شيء بالمعنى الحرفي . حسيت بمشاعر الألم لأني بشر مارح اكابر وأقول عادي ولا مو مهم . بعدين هديت وقلت الحمدلله خيره من الله وانا راضيه وان شاء الله رح تتحقق بالوقت المناسب. بس حابه أشارك معكم هذي اللحظه عشان لو كان عندكم امنيات وما تحققت مو مشكله حسوا بالحزن مو نهاية الدنيا وبعدها واسوا أنفسكم

 بكلام إيجابي وان شاء الله فيه امل بالمستقبل

اليوم التاسع والعشرون

 "وَتَحْسَبُونَهُ هَيِّنًا وَهُوَ عِنْدَ اللَّهِ عَظِيمٌ"

تدرون يا أصدقاء من الأشياء الصعبه في الابتلاء هو الصمت انك ماتقدرين تتكلمين وانتي موجوعه من جواتك فتسكتين عشان نفسك بس لان انتي الي مقدره وضعك النفسي. فالصمت اصعب من الكلام لان هو من الأفكار الي تجي ببالك تأذيك او الدم الي يغلي بعروقك او الحرقه الي بقلبك كله يجمع مع بعض بنفس اللحظه، تقولين لو تكلمت كان احسن لي من كل هذا. بس تذكرين نفسك تقولين ماعليه بس هذي المره وفيه رب يأخذ الحق ارجعي له ماعليه اصبري والفرج قريب ان شاء الله. لكن فيه مقوله عجبتني وحابه اشاركها معكم

 من لا يصنع لنفسه مقاماً، سيُركن دائماً في الزوايا الُمهملة

(ومن يتق الله يجعل له مخرجاً ويرزقه من حيث لا يحتسب)

بالتقوى تُرزق من حيث لا تحتسب فتحيا الحياة الطيبة

كتاب لكنود-إسلام جمال

اليوم الثلاثون

ما تدرون انا كنت حزينة بشكل صعب على اخر كل لحظة بهذا اليوم. المهم على المغرب حطيت بانر العيد وجلست اخطط لهذا المحتوى وايش حابه اكتب عنه في شوال بأذن الله. بعدها جلست ادون للمرة الأخيرة بإذن الله ومن غير شر في نوتة رمضان😭بقلب حزين والله. بعدين قرأت في كتاب قصة الأيمان. واخر شيء قررت اجلس اكتب المذكرات هذي بما ان ما عندي شيء أسويه

مختصر تجربتي في رمضان٤٧

السنة الي فاتت قيمت تجربتي مع العزله في رمضان وبهذي السنة حابه اسوي نفس الشيء واكتبت لكم مختصر الشهر كيف كان

اجمل رمضان مر علي بحياتي حتى افضل بكثير من رمضان الي فات الحمدلله. طلعت بعلاقه جديده مع الله مارح ادخل بتفاصيل فيها، وأيضاً الحمدلله العبادات ميسره ما شاء الله وأكثر شيء افتخر فيه اني قدرت اختم القران(تلاوة) 🥹❤️ في رمضان الحمدلله ما خبرتكم اني قاعده اختمه عشان الامر يتم على خير

طيب نفسياً كان عندي لامبالاة عجيبة ماكنت عارفه سببها في بداية رمضان. لكن بعدها عرفت وصرت اشتغل على هذا الموضوع الحمدلله، بس كنت مرتاحة نفسياً مع نفسي لكن مع الناس لا وهذي مشكلتي الأزلية من قبل رمضان الحمدلله على كل حال 🫠. عجبني التزامي وتفاعلي بالموقع ما شاء الله رغم الضغط الي اعيشه

التدوين اليومي كان ما شاء الله ممتاز بس ماكنت اعبر فيه نفس السنة الماضية لأني كنت استعمل نوتة التشافي للتعبير أكثر. ما علينا في رمضان هذا ماكنت اطلع من البيت حتى المشي ما مشيت ولا كنت اروح كوفي مالي نفس اطلع شعور غريب

واما بالنسبة للروتين ويومياتي فشاركتها معكم في المذكرات الرمضانية. على أي حال كانت تجربه حلوه جداً الحمدلله وطلعت منها بأشياء كثيره ايجابيه بفضل الله. وبس هذا تقييمي لتجربتي في رمضان ٤٧وربي يعوده علينا بالخير والبركة

أتمنى تكونوا استمتعوا بمذكرات رمضان مثل ما انا انبسطت فيها، ورح تلاقون تحت كل المحتويات الخاصه في رمضان اذا ما قرأتموها من قبل

❤️وأتمنى لكم عيد سعيد وليلة سعيدة ومريحة