مذكرات رمضان ٤٧الجزء الثالث/وارجع اعيش
!! رأيت الله
كلمات أرددها عقب كل معركة في هذه الدُّنيا
رأيت الله في فعله.. في قدرته.. في إرادته وتدبيره
رأيت الله حين أوشكت على السقوط.. فأقامني هو
رأيت الله حين سُدت الأبواب.. فاستقبلني هو
رأيت الله حين قالوا مُستحيل.. فملكني هو
.. تفاءلت به
فأعلنت أنا الحرب على الدُّنيا وقلت هاتي ما شئتِ
فمن معه رب أنتِ قبضته.. لا يعود مُنهزماً
لكنود- أسلام جمال
أهلاً يا أصدقاء.. جمعة مباركة عليكم، اليوم بشارك معكم الجزء الثالث من مذكرات رمضان. بهذا الأسبوع رح اشاركم كيف أعيش ايامي الحقيقيه في رمضان وبعض الأحداث الي صارت لي فيهم
اليوم الخامس عشر
بديت اليوم بالروتين اليومي والتنظيف، بعدها كان فيه امر شاغلني وقرار لازم اتخذه بصراحه انا كنت مأجلته لأني كنت تعبانة ومالي نفسي اسوي شيء حتى لو تفكير. بس بعد ما اخذت بريك ارتحت الحمدلله وجلست افصل الموضوع. طيب انا كيف اتخذ قرار اذا كنت محتاره بين خيارين ؟ الي اسويه اول شيء استخير وادعي الله ، ثانيا اذا حسيت لسى بحيره او توتر اقوم اجيب ورقه وقلم واكتب الامرين واحط سلبياتهم وايجابياتهم . وأي امر اشوف ايجابياته اكثر امشي عليه وسبحان الله ياما نفعتني هذي الطريقة لما أكون محتاره نفس كذا. ما علينا الحمدلله اليوم افضل من امس بكثير مشاعر الألم الي حسيتها اهداء بفضل الله
اللهم خلص صدورنا من هيمنة القلق وأنزل عليها فيضاً من الطمأنينة لتهدأ
اليوم السادس عشر
انا بعد المغرب أحب اجلس وامارس اللغة الفرنسية تعودت من قبل رمضان على هذا الروتين. أكون سبحان الله مركزه أكثر ما شاء الله، طبعا انا استخدم برنامج دولينجو عشان اتحمس للممارسة لأني لو جلست على النظام حقي القديم مارح انجز وانا حاطه هدف براسي من ناحيته
استخدمت اليوم كتاب التمارين هذا، هو عندي من لما كنت في الجامعه تغيير شوي عن طريقة التعلم المعتادة. بكل امانه انا محتاجة اجلس جلسة محترمه وأركز على التعلم اكثر من كذا بس ادعولي اضبط وقتي مضبوط عشان أوصل لهدفي بإذن الله 😮💨. بعدها راجعت تدوينة يوم الجمعة على السريع، بعدين جلست اكتب خطواتي بموضوع القرار الي اتخذته ايش لازم أسوي بالضبط بالتفصيل. وسبحان الله بهذا اليوم كنت أفضل من الأيام الي قبل بكثير الحمدلله يارب
المهم على اخر الليل كذا بعد ما خصلت كل الي علي كنت فاضيه فجلست اتابع مسلسل هندي وكان الجزء الثاني صراحه أفضل بكثير من الجزء الأول والقصة حلوه مره لدرجة خلصت الحلقات بظرف يومين ما شاء الله. هو أصلا ٨ حلقات مو كثير بس القصه تشد مره. انا أحب مسلسلات الجريمة لجنوب الهندي محبوكة وتخليك تشكين في الكل ومتعرفين مين الي ارتكبها وكل حلقه فيها حدث حرفيا وماتطفشين ما شاء الله وانتي تتابعين
اللهم اشفِ كل من يتألم ولا يعلم بحاله الا انت اللهم اشفِ مرضانا ومرضى المسلمين
اليوم السابع عشر
سبحان الله على الساعة ٣ بالليل حسيت بنوبات خوف وقلق وقلبي يدق بسرعه وكنت أرجف مره هو لسببين. سبب منه اني شربت قهوه كثير ما شاء الله بالليل فكان شعور متعب صراحه فالحمدلله جلست ادعي، استغفر و اتنفس كذا مره. وشربت مويا على قد مقدر قبل الاذان والحمدلله عدت على خير ونمت زين. على الساعة ٦ كذا طلعنا براء عشان نفطر بالحديقة شوفوا انا كنت متوترة من الطلعه قبلها بالليل ما عرف ليه حسيت كأني رايحه مقابلة عمل 😅. ممكن لأني من زمان ما فطرت مع احد برمضان وأول مره بحياتي افطر بحديقة فكان شعور جديد علي
كان يوم حلو مره ما شاء الله واشتقت افطر مع الناس ولجلست السفرة والسوالف نسيت هذي الاجواء. الحديقة تحفه ما شاء الله وفيه ناس كثير كانوا طالعين يفطرون وأطفال تلعب ما شاء الله. تصدقون من زمان ما طلعت برمضان براء البيت بالنهار كان شعور مختلف وجميل صراحه. ما عرف الروحه عجبتني مريحه ما شاء الله وفصلت شوي عن الروتين وذكرى حلوه لي مستقبلا بإذن الله
بعد ما رجعت تخيلوا كنت أحس بخمول وحسيت بشعور الشايب الي في طاش ما طاش الي يقول ابي قهوة 😂. كنت ميته ابغى قهوة و مره مرهقه، ممكن لأني من زمان ما طلعت فكان فيه حركه وناس رايحه جايه وازعاج ما شاء الله والجو كان فيه بروده فكنت خلاص ابغى اريح واشرب قهوة وبس. وبعد ما ارتحت كم ساعة قررت أقوم أسوي اول روتين استعداداتي للعيد الي هو شعري لأني ابغى أخلص قبل العشر الأواخر بإذن الله عشان أركز بالعبادة أكثر
اللهم دبر لنا من الجبر والعوض ما ينسينا ويرضينا
اللهم بشرنا بكل دعوة تسكن قلوبنا
اللهم أسعدني ارضني وجمل اقداري
اللهم اجعل ما اسعى إليه يسعى إلي
اللهم اجعلني أرى أمنياتي تتسابق علي بتسخيرٍ منك
اليوم الثامن عشر
بعد ما خصلت روتيني لليوم كنت طفشانه مره فقررت اقراء اخر كتاب من الكتب الي اشتريتهم ببداية السنة. هي رواية خياليه جريمة ادري مو وقته عشان رمضان بس ما عندي غيره صراحه لكن قررت اجلس كذا واطلب كتب بفئات معينه ان شاء الله ايش تتوقعون هي؟
ما علينا اذكر بنهاية اليوم انقالت لي جمله " من يوم ما عرفتك وانتي قوية ما شاء الله" تدرون قد ايش اثرت فيني هذي الجملة 🥹 انا دائما أقول لنفسي كذا بس كنت محتاجه اسمعه من احد عشان ارجع اتوازن مره ثانيه. واذكر نفسي انا مين وايش مريت فيه بس ربي سبحان الله يرسلك شخص بهذا التوقيت عشان يقولك كلام انت محتاج تسمعه عشان تفوق لأنك مانت قادر تقوله لنفسك. ❤️ربي يسخر لي الناس الجميلة الطيبة يارب العالمين
اليوم التاسع عشر
….. كان يوم عادي في بدايته وسويت فيه روتيني المعتاد الى ان
۞ أَلَمْ تَرَ إِلَى الَّذِينَ نَافَقُوا يَقُولُونَ لِإِخْوَانِهِمُ الَّذِينَ كَفَرُوا مِنْ أَهْلِ الْكِتَابِ لَئِنْ أُخْرِجْتُمْ لَنَخْرُجَنَّ مَعَكُمْ وَلَا نُطِيعُ فِيكُمْ أَحَدًا أَبَدًا وَإِن قُوتِلْتُمْ لَنَنصُرَنَّكُمْ وَاللَّهُ يَشْهَدُ إِنَّهُمْ لَكَاذِبُونَ (11)
لَئِنْ أُخْرِجُوا لَا يَخْرُجُونَ مَعَهُمْ وَلَئِن قُوتِلُوا لَا يَنصُرُونَهُمْ وَلَئِن نَّصَرُوهُمْ لَيُوَلُّنَّ الْأَدْبَارَ ثُمَّ لَا يُنصَرُونَ (12
لَأَنتُمْ أَشَدُّ رَهْبَةً فِي صُدُورِهِم مِّنَ اللَّهِ ۚ ذَٰلِكَ بِأَنَّهُمْ قَوْمٌ لَّا يَفْقَهُونَ (13)
لَا يُقَاتِلُونَكُمْ جَمِيعًا إِلَّا فِي قُرًى مُّحَصَّنَةٍ أَوْ مِن وَرَاءِ جُدُرٍ ۚ بَأْسُهُم بَيْنَهُمْ شَدِيدٌ ۚ تَحْسَبُهُمْ جَمِيعًا وَقُلُوبُهُمْ شَتَّىٰ ۚ ذَٰلِكَ بِأَنَّهُمْ قَوْمٌ لَّا يَعْقِلُونَ (14)
كَمَثَلِ الَّذِينَ مِن قَبْلِهِمْ قَرِيبًا ۖ ذَاقُوا وَبَالَ أَمْرِهِمْ وَلَهُمْ عَذَابٌ أَلِيمٌ (15)
كَمَثَلِ الشَّيْطَانِ إِذْ قَالَ لِلْإِنسَانِ اكْفُرْ فَلَمَّا كَفَرَ قَالَ إِنِّي بَرِيءٌ مِّنكَ إِنِّي أَخَافُ اللَّهَ رَبَّ الْعَالَمِينَ (16)
فَكَانَ عَاقِبَتَهُمَا أَنَّهُمَا فِي النَّارِ خَالِدَيْنِ فِيهَا ۚ وَذَٰلِكَ جَزَاءُ الظَّالِمِينَ (17)
يَا أَيُّهَا الَّذِينَ آمَنُوا اتَّقُوا اللَّهَ وَلْتَنظُرْ نَفْسٌ مَّا قَدَّمَتْ لِغَدٍ ۖ وَاتَّقُوا اللَّهَ ۚ إِنَّ اللَّهَ خَبِيرٌ بِمَا تَعْمَلُونَ (18)
اللهم صبراً، اللهم جبراً، اللهم قوة
اليوم العشرون
كان يوم الحمام المغربي والليزر صراحه أصعب مهمه بالعناية ما عرف متعبه مره😩. المهم بعدها جلست ادون وافضفض شوي عن أمس والي صار لي ضروري أسوي كذا لان صحتي مو ناقصه صراحه. احكي لكم شيء انا من سنتين طلعت لي حبه حمراء بساقي اليمين وانتم بكرامه في البداية حسبتها حساسية بسبب تغير الفصول وكانت تحكني مره فطنشت الامر. وفجأة بعدها بكم شهر شفت انها انتشرت بدون ما ادقق فيها، وتطلع بالبداية لونها احمر وبعدين يصير لونها اسود ويصبح شكلها غريب كأنها جروح سوداء اسفه على الوصف
المهم وقتها قررت اخذ مرهم من الصيدلية ما فاد، بعدها قررت احط عشبه عليها ما فاد بعدها رحت عيادة جلديه واخذت مضاد حيوي غالي ومرهم وما فاد .وفي هذيك الفترة قررت أسوي مضاد حيوي أرخص في البيت وشاركت معكم وصفات المشروبات بس ما ذكرت لكم ايش السبب. ما علينا اخر شيء اشتريت مرهم من عند واحد عندنا يداوي بالأعشاب وشفت ناس بحياتي ما شاء الله تعافوا من امراض جلديه بفضل الله ثم فضله لكن أيضاً ما فاد. فامن هنا عرفت ان الي فيني نفسي خاصه انها تحكني مره لما ازعل او اتعب نفسياً
فقررت اطنشها واوكل امري لله وما سوي فيها شيء والحمدلله على كل حال هي لسى موجودة بس الحمدلله انها وقفت انتشار لكن فيه حكه. المهم من بداية السنة الي فاتت صار يجيني افهاق (او الحازوقه/الفواق/ الشهقة/الزغطة) وكان يجي مره بالأسبوع. بس سبحان الله ببداية هذي السنة صار يجيني أكثر من مره باليوم واحياناً وراء بعض. وأيضاً صاير عندي مشكله بالبلع ويوقف الاكل في حلقي ولا مشروب يفيد ابداً وأحس بالاختناق بسببه ويادوب اتنفس والم بالصدر. وكل هذا مارح اروح المستشفى تدرون ليه؟ لأنه كمان نفسي ورح يقولون ما عندك شيء
اذكر لما كنت بالعشرين كنت طول الوقت تجيني امراض جلديه بأسماء عجيبه ووقتها كنت ما انام. فقلت للدكتورة ممكن تعطيني منوم عشان انام لأني اصحى عشان اهرش الحساسية،” قالت لي يا بنتي انا اعطيك منوم ينوم جمل ما شاء الله كيف ما تنامين؟” “فقالت لي نصيحة ان الي فيك هذا نفسي مو عضوي. ريحي نفسيتك وبإذن الله رح تختفي الامراض واذا ظليتي كذا رح تجلس معك الى نهاية العمر”، ووقتها خفت فحاولت جاهده ما فكر واريح اعصابي وفعلا راحت الحمدلله
طيب اما الان انا سويت الي علي وأكثر تعبت من كل شيء، حاولت اريح نفسي بس ما قدر اخدع جسمي واقوله ان كل شيء تمام خاصه اني احس جسمي عباره عن مشاعر قلق خوف وتوتر كيف بيسترخي المسكين. انا عايشه تحت رحمة الله خاصه بهذي الفترة لأني .... الله يفرجها
ما سينتهي لن يؤذيك
وما سيأتي سيغسلك
وأنتِ أقوى مما تظنين
🤍 أطمئني يا سامية
..هذه ليست نهاية
. هذه نقطة عبور
اليوم الواحد والعشرون
اليوم الحمدلله كان اخر يوم بجدول العناية مره فخوره بنفسي ما شاء الله اني خلصتهم. يصير كذا انشغل بالعبادات صح وما ضغط نفسي بأخر أسبوع. عندي سؤال لكم هل انتم من الناس الي تعطون أنفسكم عيديه او لا؟ انا حبيت اعطي نفسي عيديه او اشتري بمعنى اصح 🤭. مارح اجيب ملابس لان ما عندي مكان اروحه بس فكرت اطلب كتب لان مثل ماكتبت لكم انا قاعده اقراء اخر كتاب عندي
طلبت ٥ كتب ما شاء الله واحد رواية وواحد تاريخ وثلاثة ديني وكلها باللغة العربية أدري شيء غريب صح فئة الكتب اقصد. بكل صراحه انا ما عندي كتب دينيه وحسيت بخجل من هذا الموضوع🫣 فحبيت اشتري. ايضاً بهذي الفترة عندي اهتمام بقصص الأنبياء عليهم السلام، يوم القيامة، الجنة والنبي محمد صلى الله عليه وسلم. فافي كتاب كنت مره ابغاه فيهم وهو يتحدث عن الأنبياء عليهم السلام والنبي محمد صلى الله عليه وسلم ، بس للأسف ما دري ايش صار والمكتبة الغته لي مره انقهرت😪. بس قلت ما عرف وين الخيره وان شاء الله اشتريه بوقت اخر
على أي حال فيه كتاب ثاني هو السبب الي خلاني اطلب من المكتبة هذي عشانه لأني سمعت عنه من قبل اسمه قصة الأيمان للشيخ نديم الجسر. وتخيلوا وصلني ما شاء الله اول شيء قبل الباقين، فوقفت قرأت الرواية وبديت فيه وان شاء الله بعد ما أخلصه ارجع لها. بصراحة لحد الان الكتاب مشوق ما شاء الله واكيد رح أشاركم تفاصيل عنه مستقبلا بإذن الله
وبس يا أصدقاء هذا كان ملخص الأسبوع الثالث من رمضان، كان عباره عن محاولتي اني أرجع أعيش. وعن نفسي ما بغى أجمل فيه شيء ، فبكون صريحه وواقعيه في مذكراتي لان المفروض فكرتها تكون كذا مبنيه على الشفافية. صراحه ماكنت ناويه أنشر اليوم بس ما قدرت كنت محتاجة فعلا انشغل ، افضفض واريح اعصابي بأكثر شيء احبه بالدنيا وهي الكتابة . وايضاً ابغى اتمعن بكل كلمه كتبتها بعدين بإذن الله. يعني ما تدرون قاعده اكتب هذا الكلام يوم الخميس الساعة ٧:٥١ الصباح بالعادة أكون نائمه بهذا الوقت بس ما قدرت …لأن !
❤️شكرا لكم على القراءة وأتمنى لكم ليلة سعيدة ومريحة
