لحظات عشوائية من حياتي/ لحظات غريبة

اهلاً يا أصدقاء.. هذي رح تكون اخر تدوينه بإذن الله قبل رمضان، فعشان كذا حابه اني أشارك معكم بعض اللحظات العشوائية الغريبة الي صارت لي خلال هذا الشهر : يومي الخاص، سيريه؟، اشم الورد،اطفال الحارة،العاب جميلة،٢٠٠ زائر،مذكرات رمضان

الساعة ٧ المغرب

يومي الخاص

انا في العادة ما روح مقهى الا بعد ما أصلي العشاء عشان اجلس براحتي. بس اليوم ما قدرت حسيت لو ما طلعت رح انفجر. بكل صراحه انا طالعه عشان ابكي أحس إني مخنوقة من الدنيا والي فيها ومابغى اشوف او أتكلم مع احد اعرفه. يعني سبحان الله أحياناً طلعت الشارع والجلوس فيه يكون امان وراحة، ما حد يعرفك كلهم غرباء شعور مريح جداً. مانتي مطالبه بالكلام او التبرير او إنك تجهدين اعصابك معهم. تجيني أيام نفسي اقضي يومي كله بالشارع ولو أقدر انام فيه بعد من شدة ما انا مخنوقة، لان ما فيه متنفس وقلبي يتقطع. دائماً يقولون ما في راحة بالدنيا ومافي أحد مرتاح بس سبحان الله الواحد يقدر يريح نفسه بالحياة انه يعيش لنفسه وما يدخل بحياة غيره، لكن الي يسوي نفس كذا يجي شخص مشغول فيه ويخرب عليه نقمت الراحة بعيشته. واتوقع حساب هذولا الناس عند الله عسير. ما عرف اعبر أكثر من كذا تعبت.. بس الله يريح قلبي ويبعدني عن الأذى الي قاعده اعيشه واشوفه

الساعة ٩ المساء

سيريه🧐

وانا ماشيه شفت محل يبيع سمبوسة حبيت أجرب الي باللحم، صراحه طعمه وكلها لحم ما شاء الله بالعادة يكون البصل والخضار أكثر منه. كان في المنيو اكله اول مره اسمع فيها اسمها الفرموزه ! بحثت عنها على السريع وطلعت اكله يعود أصلها لشرق ووسط اسيا وهي معجنات محشيه باللحم. سبحان الله انا ليا تقريباً ١٣ سنة ساكنة في المدينة ولحد الان ما عرف عنها شيء وكل شوي اتعلم حاجه جديدة. اذكر من كم سنه كانت فيه وحده قاعده تتكلم عن اكله تقول ” عجبهم السيريه الي سويته”، سألتها “ايش هذي الأكلة اسمها غريب؟” جلست تضحك “ تقول مو من جدك ما تعرفينها”. قلت لها “ لا هل هي حلو او مالحِ🥹؟” جلست تناظر فيني انو هذي عبيطة وكملت كلامها😕. ولاعرفت ايش هذي السيريه غير بعدها ممكن بسنتين اختي ذوقتني أيها وافتكرت الموقف هذا، طبعاً السيريه هي اكله نيجيرية عباره عن لحم او دجاج متبل ومطبوخ على الفحم. وايضاً من شهر اكتشفت ان التميس او التميز أفغاني كنت احسبه يمني🫠 يلا كل يوم اتعلم معلومة جديده سبحان الله

الساعة ٩:٣٠ المساء

أشم الورد

اليوم الجو برد وهواء قوي وخائفة على نفسي لأمرض. ما علينا وانا ماشيه على طريق البيت فيه ورد وماقدرت ما اصوره، اشوف السيارات ماشيه احس جوأتهم يقولون هذي الظريفة ايش تسوي 😅 ما عرف احب الورد واحب اشم ريحته واحب اصوره. طبعاً انا مو محترفة بالتصوير بس اصور للذكرى. أصلاً انا المفروض إني اشتغل على جانب التصوير هذا عشان اطور من جودة صوري للموقع بس سبحان ماني رايقه لهذا الشيء لحد الان الله المستعان

الساعة ١٠:١٥ المساء

أطفال الحارة

وانا ماشيه واشوف أطفال جالسين عند المسجد، ومسوين جلسة ما شاء الله وجايبين قهوة وشاي ويلعبون ويسولفون مع بعض. سبحان الله مره عجبني المنظر من زمان عنه لان الحين كل الأطفال جالسين على جوالاتهم ولا يطلعون من البيت ولا يتعرضون للشمس او يختلطون بالطبيعة. أحزن عليهم صراحه لان فايتهم كثير اشياء حلوه وإذا كبروا رح يحسون بهذا الشيء. فما شاء الله عجبوني انهم مسوين كذا والاهم ما شاء الله انهم ماهم ماسكين جوالات ومستمتعين مع بعض

الساعة ٨ المساء

ألعاب جميلة

رحت جادة قباء ومره زحمه بعد على قرب رمضان😓، حسيت بالتعب صراحه بسبب الازعاج. كنت واقفه عند محل وشفت هذي العرائس مره جميله ما شاء الله حسيت الطفلة الي جواتي مبسوطة. ياريت على أيامي كانت فيه كنت رح أحس إني اسعد طفله بالحياة شكلهم يجنن ما شاء الله

الساعة ٧ المغرب

٢٠٠ زائر

دخلت على الموقع احفظ التدوينة الجديدة وقلت بالمرة اشيك على الزيارات وشفت إني وصلت الى ٢٠٠ زياره ما شاء الله. ولي اول مره من لما فتحت الموقع اوصل لهذا العدد شكراً كثير لكم، توني من فتره كتبت عن هذا الشيء سبحان الله🥹 يارب انك تحقق لي امنياتي قريباً وعلى خير مثل ما حققت هذي الرغبة بدون ترتيب مني بقدرتك يارب😔. المهم لاحظت انكم تحبون مواضيع التنظيم والروتين، ومؤخراً مواضيع التدوين وتجاربي مع الوحدة، وحالياً موضوع الخوف من التغيير هو اعلى قراءة عندي ما شاء الله، واضح انكم استفدتوا منه مره. وفيه مقال عمري ٣٠ ولم اتزوج له سنين من لما كتبته وهو الأعلى قراءة. يعني لاحظت انكم تحبون المواضيع العميقة وانا اكتبها بصدق ومن كل قلبي رغم انه صعب علي كتابتها ونشرها بس سبحان الله ربي يسرها

على أي حال شكراً لكم على ثقتكم فيني وانا ممتنه لكم واحد واحد رغم اني ما عرفكم وانا مايطلع لي اليوزرات بس يطلع لي عدد الزيارات الجديدة. لكن فيه ٦ او ٥ اشخاص خلينا نقول لان انا رقم ٦ لأني ادخل اقرأ واشيك عليه 😅. خمس اشخاص زوار دائمين حابه اشكركم شكر خاص على دعمكم وعلى قرأتكم المستمرة، يعني ما تدرون قد ايش تحمسوني إني أقوم اكتب وانشر رغم صعوبة الامر لي. انا صار لي ٣ سنين اكتب ما شاء الله ومن غير سنتين انشاء للموقع يعني تقريباً كلها ٥ سنين وانا اشتغل على الموقع. ومافيه تقدم من الناحية التقنية، التصوير والتسويق له بشكل عام

وأحس بالإحباط يعني أقول هل فيه أحد مهتم ولا انا قاعده امشي وراء سراب وجاتني لحظه الأسبوع الفائت نفسي ادخل واحذف الموقع بشكل نهائي اعوذ بالله من الشيطان الرجيم، أقول ماحد داري عني خليته او شلته😪. وهل هذي علامة من الله ان هذا مو شيء المفروض أكمل فيه. لكن استرجعت تعبي معه خاصه مره بنهار رمضان وانا جالسه اعدل بالإيميل وكانت الخطوة مجهده وماهي راضيه تضبط، فبكيت من القهر بسببها😭 غير هديت نفسي والحمدلله ربي فرجها علي. ما نسى هذيك اللحظة وتعبي فيها فتراجعت. بس شكراً لكم سواء فعلا كنتم زوار دائمين لأني خائفة أكون انا أنتم ومايكون فيه زوار أصلا من كثر ما دخل عليه واقراء ما شاء الله 😂

الساعة ٧ المغرب

مذكرات رمضان

كنت تعبانة نفسياً ومخنوقة فقررت اطلع وماعرف وين اروح فقلت ليش ماروح المكتبة واطبع أوراق رمضان. انا طبعت نفس الستيكرات حقت رمضان الي فات وماغيرت فيها شيء، والعبارات الاسبوعية غيرت الكلام بس نفس تصميم الورقة ما حبيت اعدل عليها. حتى زينة السنة الي فاتت رح استخدمها بإذن الله مارح اشتري ولا أسوي شيء جديد، بس اشتريت لي كوب طقوس سنوية لنفسي☺️. ولا عندي خطه أسوي روتين ولا حاجة. يعني السنة الي فاتت كان عندي خطط عشان اغير جو واستمتع برمضان، لكن هذي السنة ابغاه يمر على خير والمهم العبادات وبس

انا مرهقه من كل شيء وماعندي طاقة لشيء ما دري ابغى اتنفس وبس مشاعر غريبه جداً. جسمي عبارة عن مشاعر توتر وقلق وكل محاولاتي للسيطرة على هذي المشاعر ما عادت تنجح فعجزت عن المحاولات. فبعيش على البركة وان شاء الله خير. اما على الموقع ماعرف ايش بسوي هل اكتب او أوقف بعد ما عندي رد مخليتها على الله. لكن حابه أهنئكم بقدوم شهر رمضان المبارك ويارب يجعله خير وبركه علينا جميعا ويعيننا الله على صيامه وقيامة. حبيت أهنئكم من الآن لإني ممكن اكتب في رمضان بإذن الله فما يحتاج مقدمات 😅، وصحيح رح احط روابط استعداداتي لرمضان الي فات ، وكيف قضيته وكل شيء عنه تحت ممكن تستفيدون منهم

شكراً لكم على القراءة، واتمنى لكم ليلة سعيدة ومريحة❤️

رمضان كريم🌹