عشت روتيني وانا ٢٤ بعمر الثلاثين

أهلاً يا أصدقاء.. السنة الماضية جربت أعيش روتيني وانا تسع سنين بعمر الثلاثين وكانت تجربه مره حلوه. بصراحة من بعدها قررت إني أخليها سلسلة لتجربة روتيناتي الي بعماري السابقة. لذلك اليوم انا حابه أعيش روتيني وانا ٢٤ بعمر الثلاثين

انا اخترت هذا العمر بالتحديد لأنه اول عمر يكون عندي روتين فية. كنت توني متخرجه من الجامعة فقررت اخذ بريك لمدة ٦ شهور تقريباً قبل البحث عن وظيفة. فحبيت إني اكتشف نفسي وكيف ابغى أعيش يومي. بالبداية كنت مبسوطة ان ما عندي مسؤوليات ودوام يا سلام راحة ما شاء الله 😁. بعدها قررت ابحث بقوقل عن الروتين الصحي لإني ما عرف احط لنفسي روتين. فذكر ان فيه خطوات يوميه مهمه لازم نسويها يومياً عشان يكون روتيننا صحي. الي هي النوم بدري، الاكل الصحي، وشرب لترين من الماء، الهوايات مثل القراءة

كيف كان روتيني

طيب انا وقتها كان فيه اشياء أحب اسويها من غير هذا الروتين الي هي احب اتصفح بالمواقع واقراء مقالات علميه، من غير احب اجلس على اليوتيوب واتفرج على فيديوهات يعني قبل ما يصير موضوع الريلز والمقاطع القصيرة. اول شيء فكرت فيه اني انام من بدري بعد صلاة العشاء مباشره وسبحان الله كانت لما تجي الساعة ٣ بالليل اصحى من النوم والقيني ما شاء الله مكتفيه مره ، بس أحاول اجبر نفسي اني انام عشان أقوم على أذان الفجر. وفعلاً أقوم على الاذان اصلي اقرأ قران والاذكار واشرب مويا كاستين كنت اجبر نفسي اشربهم😔. بعدها أقوم البس لبس رياضه واطلع الحوش امشي لمدة ١٠ او ٢٠ دقيقه وكنت اشوفها مره كثير 😅 ماشاء الله. بعدها استحم وما كان عندي روتين لا لجسمي ولا لبشرتي ولا لشعري بس كنت افرشي اسناني وبس 😔

المهم بعدها اروح افطر وطبعاً كنت باحثه عن نوع الفطور يكون شيء خفيف ساندويش مع خضار سبحان الله هذا الشيء اطبقه لحد الان لأنه عجبني. شوفوا بهذيك الفترة كان فيه جوالات لكن انا ماكنت امسك جوالي غير للضرورة عشان الواتس او مكالمه ضرورية (وكان اندر من الندور انها تصير 😂) واخليه ما احب اجلس عليه نهائياً فكنت على اللاب اكثر شيء. ما علينا بعد الفطور كنت اجلس على اللاب توب اقرأ مقالات من الجرائد بأي فئة كنت أحب اتعلم معلومة جديده يومياً من لما بداء موضوع المنتديات أحب اجلس اقرأ واتثقف

على أي حال ايش أسوي عشان امارس الكتابة باللغة الإنجليزية بعد ما اقرأ المقال أقوم اسوي تلخيص عنه باللاب انا ايش فهمت وايش استفدت من المعلومة وانبسط مره ما شاء الله 🥹 احس بالإنجاز. بعدها اذا عندي تنظيف في البيت اسويه بهذي المدة. على الساعة ١٠ الصباح اخذ بريك اكل سناك فواكه تفاحه مع اني ما حب التفاح بس عرفت انه مفيد صرت اكله بالغصب عشان الفائدة 🥲. ووقتها بديت اشتري كتب واقرأ كاهوايه وكنت اقرأ كتب تطوير الذات بالإنجليزي عشان امارس اللغة طبعاً، واحط المنبه على ١٠ دقائق و اسمع موسيقى معينه عشان ادخل بجو القراءة 😅

الساعة ١١ الصباح اتابع مسلسلات على دبي زمان كانت عشقي هذي القناة ووقعت بغرام المسلسلات القديمة بسببها. لما تجي ١٢ الظهر أقوم اطبخ لي الغداء ما فيه افتكاسه ياكبسه يا مكرونة مع سلطه، لإني بهذيك الفترة كنت أكره شيء اسمه مطبخ وطبخ وشغل البيت واسويها وانا مجبره وكارهه حياتي. المهم بعد الغداء اخذ قيلولة عشان أكون مرهقه وصاحية من الفجر بس أحاول ما طول عشان أقدر انام بالليل. بعد ما انام ساعة كذا اصحى على ٣ يكون تقريباً اذان العصر أصلي واقوم أسوي قهوة عربي، وكنت في بداية موضوع شرب القهوة والقهوة السعودي كانت تسهرني وتعب لي قلبي ياعمري ياناس🥹 الي يشوفني الحين مع الكابتشينو ماشاء الله 🤣

المهم انا من زمان لازم أحلي بيومي حتى لو انا مسوية رجيم. فكنت أسويها واشرب فنجالين وان كثرت مره ٣ واكون على عيني وخائفة لأسهر بالليل 🥲 ياويلي ياناسو علي 😅واكل معه قطعت حلو بسيطة واذا مافي اكل رطب ٣ بالعدد ما اكثر عشان اخاف ازيد السعرات الحراريه اليومية. ايضاً كنت اتابع أفلام كرتون بهذا الوقت واعيد ذكريات الطفولة. وعلى المغرب أكون خلاص ميته نعس ومرهقه ومجهده وابغى اريح بس أقوم اجهز العشاء وهو شيء خفيف زبادي مع فواكه لان يقولون هو افيد للصحة وننام زين بعدها. وأحب اتفرج على مسلسل بدبي زمان أصلاً كنت بهذاك الوقت ما غير القناة مشغلتها طول الوقت ما امسك الريموت غير أقصر او ارفع الصوت بس. بعدها افرشي اسنان اتوضى واصلي العشاء وانام وأكرر نفس الروتين

كيف كانت شخصيتي

كنت بريئة ما عرف عن الناس والحياة الواقعية شيء، اتعامل مع نفسي بدون مشاعر وإلزمها على اشياء و اقولها ان ضروري اسوي كذا. اجلد وانتقد نفسي كثير واتحطم اذا ما أنجزت المهمه مثل ما ابغى و أيضاً موضوع الكمالية كان عالي جداً عندي بهذاك الوقت. أي معلومة سمعتها او قريتها انها مفيدة اقتنع فيها واصدقها من غير ما احلل الموضوع براسي او أقول طيب هذا انا ما احبه ومقدر أسويه نفس غيري مثال اكل التفاح. كنت بمرحلة اكتشاف لنفسي وروتيني وهواياتي. أحب ارضي الناس كثير حتى على حساب نفسي وما عرف أقول كلمة لا لاحد وما عرف احط حدود للناس

اضغط على نفسي على شان الناس ما تزعل، حتى لو هم الي مضايقيني ومزعليني أحط اللوم علي وان انا السبب 😓 كل شيء يقول هذي اثار تلاعب عقلي ونفسي 😞 بس للأسف ماكنت اعرف. ما كان عندي ثقة بنفسي بكل جوانب حياتي والي أفكر فيه كيف انجز عقليتي عمليه بحته. كنت أحس اني رجل الي ما ينفع ارتاح او اخذ بريك. وان استحقاقي الذاتي، قيمتي الذاتية، احتوائي لذاتي واحترامي لذاتي كلها ماهي موجودة عندي وماكنت اعرف هذي ايش أصلاً. تعرفون كنت أحس أني شخص شفاف ماحد شايفني وحاس فيني او يحبني وان ما استحق اعبر عن رأيي وان يكون عندي نعم واكون سعيدة

كنت أحس بشعور إني شخص زائد بهذي الدنيا استغفر الله العظيم يارب. وانا بحاجة إني اخذ البريك هذا للتجربة فقط وأسوي روتين مفيد بسرعة عشان الحق اتوظف واكسب فلوس بشكل سريع لاني مابغى احس اني عاله على احد. فكنت أفكر كثير كثير كثير جداً وأقول سامية انجزي واقارن نفسي بغيري كنت بإيجازه كم شهر بس مضغوطة بالتفكير. ماكنت اشوف ان الحياة فيها شيء حلو ولا اشوف ان انا فيني شيء حلو او إيجابي عشان أحب نفسي او عشان الناس تحبني وتهتم فيني. صحيح كان عمري ٢٤ سنة بس أحس اني لسى طفله ما عرف شعور غريب وللأسف حتى الي حولي كانوا يعاملوني بهذي الطريقة فهذا اثر علي بنظرتي لنفسي. وعندي خوف من التغيير واني اعبر عن نفسي ومشاعري مع ان كان عندي أفكار ابداعية كثير ما شاء الله بس كنت اهرب للخيال عشان اعبر عنها براحتي

كيف عشت الروتين بعمر الثلاثين

أولاً حابه اعتذر إني رح اسوي الروتين بالمقلوب للأسف يعني من العصر الى الفجر عكس قبل تمام لأني ما قدر انام في الليل وانا توني صاحية عشان تجربه

صليت وقريت قران والأذكار وشربت مويا بصراحه مره كثير كاستين ، يعني زمان كنت اجبر نفسي اشربهم وراء بعض وأقول تحملي هذا الصح مره غلط🥲

وقت الغروب — **الساعة ٥:٣٠ العصر**

**الرياضة**

طلعت مشيت بالحوش اقل من ١٠ دقائق صراحه لان جسمي مكسر، هذا الأسبوع طلعت يومين وراء بعض ومشيت فيهم مشي ما شاء الله لسنه قدام .عشان كذا احس مرهقه وابغى بس ارتاح وانام ،لكن قلت بمشي على مهلي بدون ما ضغط على جسمي وعدت على خير الحمدلله

فطور صحي — **الساعة ٦:١٥ المغرب**

**الفطور**

استحميت وصليت الحمدلله بعدها الاكل، طبعاً اكلت ساندويش سبحان الله نفس نظامي الحالي يعني اكتسبت هذي العادة من ٩ سنين ماشاء الله

**الساعة ٦:٥٠ المغرب**

**قرأت مقال علمي**

جاء وقت اقرأ مقال بجريدة والخصه على السريع. الموضوع الي قريته عن الجينات وهي دراسة مأخوذة من جامعة نورث كارولينا، انا رح اكتب لكم ايش فهمت بمختصر من المقال يعني مو كلام علمي بحت تمام 😁. انا من زمان خطر لي سؤال عميق كذا ان احنا كابشر مرتبطين بأمهاتنا اكثر او إبائنا اكثر ؟. يقولون ان عندنا في جسمنا نوعين من الجينات الاول يشمل فيه ٥٠ بالمية من جينات ابائنا و٥٠ بالمية من جينات امهاتنا تمام، ممكن تكون هذي ال٥٠ ٪ أي شيء لون بشره شكل عيونك لون شعرك وصفات واطباع عاد انتي اجلس وشوفي ايش اخذتي من والدك والدتك من صفات جسدية و شخصية

في هذا الجين فيه شيء اسمه الجينوم مارح ادخل بالتفاصيل عنه لكن هو الي يٌعرف جميع المعلومات الجينية للخلية الجسدية بمعنى انه يحدد الخصائص الجسدية للشخص. الي يصير ان جينات ابهاتنا تكون مسيطرة من هذه الناحية بالخصوص من ناحية الصحة. على سبيل المثال اكتشفوا الباحثين ان اذا ورثت طفره سيئة وكان تأثيرها كبير على صحتك فهي جايه من والدك لان جيناته من ناحية الصحة تكون غالبة سبحان الله 🥹. وصحيح فيه معلومة اضافيه ان احنا نلتقي مع اخواتنا ب٢٥ بالمية من جينات الاب والام مع بعض، ممكن تكون الخمس وعشرين هذي صفات شخصية او جسديه

اما الجين الثاني فهذا نكون مرتبطين فيه بأمهاتنا ونأخذه منهم فقط. وهو يحتوي على انسجه تتطلب الكثير من الطاقة وهذي الأنسجة موجودة بالدماغ والعضلات. وهي تحتوي على الميتوكوندريا(المتقدرات) هي عضيات خلوية مزدوجة الغشاء تعرف بمحطات الطاقة في الخلية، حيث تنتج أكثر من ٩٠٪ من طاقة الجسم. بمعنى لولا الله ثم هذا الجين مارح تتولد الطاقة بأجسادنا من خلال الطعام. يعني باختصار شديد جميع الميتوكوندريا الي بجسمنا اخذناها من امهاتنا فحنا نعتبر مرتبطين بأمهاتنا أكثر من أباءنا. سبحان الله تعجبت من صنع الخالق وحكمته والدراسة ادهشتني صراحه وجاوبت على سؤالي. وأنتم ايش رأيكم فيها؟ هل تعجبتو نفسي او لا ؟

عندي تنظيف في البيت فبنظف الان

كتاب لكنود — **الساعة ١٠:٣٠ المساء**

**قراءة**

انا ما عندي كتاب تطوير ذات فبستعير من عند اختي، وبأكل السناك الله يعين ماحب التفاح فجبت أصغر تفاحه بالحياة زمان كنت اغصب نفسي اكله وأقول لا صحي لا تعترضين 😩. ما علينا بقرأ ورح اسمع أصوات طبيعية لإني ما عدت اسمع أغاني وموسيقى الحمدلله الله يثبتني يارب 🥹. عجبني الكتاب جداً وخلصت الفصل الأول ما شاء الله بكتب لكم باختصار عن ايش كان. يتحدث عن السعادة والرضا وفي مثال كتب عنه وهو دراسة سووها عن السعادة وطلبوا من زوجين يكتبون انطباعهم عن السنة السابقة

الزوجة كتبت ان زوجي سوا عملية ازالة المرارة وجلس بالفراش شهور، صار بالستين وترك وظيفته بدار النشر الي يشتغل فيها من ٣٠ سنه. مات والده في هذيك السنة أيضاً، ورسب ابننا في كليه الطب لأنه تعطل عن الدراسة بسبب أصابته في حادث سيارة. وبنهاية الورقة كتبت كانت سنه سيئة للغاية

اما الزوج كتب شُفيت من الم المرارة الي عذبني سنين طويله، وصار عمري ستين وانا بصحه وعافيه ورح اتفرغ للكتابة بعد ان تم التعاقد معي على نشر أكثر من كتاب مهم. عاش ابي حتى وصل لل٩٥ سنه من غير ان يسبب المتاعب لاحد ومات بهدوء من غير الم، ونجى ابننا من حادث السيارة وشفي من غير عاهات او مضاعفات. وختم الزوج بعباره، يالها من سنة أكرمنا الله بها، وقد انتهت بكل خير

سبحان الله كلهم عاشوا نفس الاحداث لكن نظرتهم بعين الرضاء مختلفة. الي فهمته اننا نسعى وراء السعادة بدون مانرضا بالي معنا بالأول، وان نحط سعادتنا على اشياء ماديه واذا صارت يخيب املنا اننا ما حسينا بالسعادة ونبحث عن شيء اخر عشان يسعدنا

مسلسل جريمة في الذاكرة، هذا كنت اتابعه وكان مره حلو فحبيت ارجع اتابعه مره ثانيه ووقعت بغرام المسلسلات السورية البوليسية بسببه

مكرونه بالدجاج — **الساعة ١٢ الصباح**

**الطبخ**

طبعاً انا أسوي لي اكل سريع ومحدود وذكرت لكم السبب، فسويت لي مكرونة بالدجاج مع سلطه. ممكن تتسألون ليش شكل الدجاج كذا؟ لاني اجيبه من السوبر مقطع بسبب كرهي لتقطيع الدجاج 🤢 لا تفهموني غلط مو دلع بس انا أكره ريحت زفرته الله يكرمكم أحس برجع يعني عندي زفرت اللحم والسمك اهون علي منه سبحان الله😓

اخذت لي غفوه بسيطة كذا لإني مجهده مثل ما قلت لكم من بعد المشي هذا الأسبوع وأحس صحصحت شوي الحمدلله

تمريه بالسمسم وجوز الهند — **الساعة ٣ الصباح**

**قهوة ومتابعة**

تخيلوا انا اشرب قهوة بهذا الوقت يارب لطفك زمان اكون نائمه بهذي الساعة سبحان مغير الأحوال. المهم بشرب قهوة عربي فنجال او اثنين فقط وبأكل معهم هذي التمرية من عمل اختي الله يعطيها العافية. بتفرج على كرتون خمنوا ايش هو؟ تذكرون لما رحت الفندق وكتبت لكم روتيني يوم الجمعة لما كنت صغيرة وخبرتكم إني كنت اتابع كرتون وانا أحل واجباتي وبحثت عنه بس ما لقيته لإني ما عرف اسمه؟ تخيلوا حصلته من بعد سنين من البحث😩 . اسمه في في والزهرات الصغيرات أقول انا افتكر ان فيه شيء متعلق بالزهور بس نسيت. لقيته بصفحه بالإنستغرام متخصصة بأفلام كرتون حقت سبيستون. مره فرحت لما حصلتها ولقيت حلقات منه باليوتيوب فبجلس اتابع واشرب قهوة واسترجع أيام الطفولة❤️

صليت القيام وبعدها بتعشى شيء خفيف زبادي وفواكه. ونفس الوقت حابه اتابع مسلسل قبل الفجر، بشوف ليالي الحلمية الجزء الأول كنت وقتها حاطه على دبي زمان وخلاص هلكانه من النعاس استنى اذان العشاء وجلست اتابعه عشان اضيع وقت قبل الاذان. عجبني مره وصرت اتحمس كل مغرب عشان اشوفه. الجزء الأول والثاني روعه أفضل من باقي الأجزاء صراحه خاصه لما صاروا يغيرون الابطال

صليت الفجر الحمدلله وفرشيت اسناني والحين وقت النوم ومافيه روتين للبشرة 🫣

رأيي في التجربة

مره استمتعت فيها كنت عارفه انها رح تكون مختلفة عن الي قبلها. صحيح إني ما قدرت أسويها بالضبط بس عدولي إياها🫠. بكل امانه انا واكتب لوصف شخصيتي حزنت على نفسي والي مريت فيه لان هذا ولا شيء وفيه أشياء عميقه ما قدر اكتبها صعبه بس حتى الي كتبته لكم حسيت بتردد احذفه او اتركه بس قلت اخليه لان هذا كان واقعي واكيد في أحد مر فيه او قاعد يمر فيه ويصير ينتبه ويسعى بتغيير نفسه

الحمدلله إني الان انتبهت لهذي الأشياء وعالجتها بفضل من الله ومن غير الحمدلله صرت الطف مع نفسي بكثير الحمدلله واشياء كثير اختلفت ما شاء الله والحمدلله. صحيح إني كنت اجبر نفسي على بعض الامور لكن سبحان الله اخذت كثير من هذا الروتين مثل شرب الماء، تنظيم الوقت والوجبات ،الهوايات ومعي لحد الان ما شاء الله. وزدت اشياء حالياً مثل جدول العناية اليومي والشهري اهتمامي بنفسي نفسياً ومن غير صرت استمتع بيومي وروتيني أكثر من انه شيء الزامي وضروري

صرت ادون وصار عندي موقع الحمدلله. اعطي التجربة ١٠ من ١٠ واكيد رح أجرب روتيناتي بأعماري الباقية معكم بأذن الله. وأنتم ايش رأيكم عجبكم روتيني او لا؟ وهل لاحظتوا اختلاف ما بينهم نفسي او تحسونه نفس الشيء؟

❤️شكراً على القراءة واتمنى لكم ليلة سعيدة ومريحة