عمر الثلاثين يعتبر مخيف للبعض خاصه للأشخاص الي في نهاية العشرين. عشان كذا حبيت اني اجاوب على الاسئله الأكثر انتشار في قوقل عن عمر الثلاثين بحكم اني في الثلاثين و لاني مريت بالخوف من سن الثلاثين. حابه اجاوب على هذه الاسئله بارتياحيه بدون تكلف و رسميات يعني كإن في شخص قريب مني و قاعد يسألني هذه الأسئلة. ابغى يكون الجو مريح و رايق ، عشان كذا اشربوا شيء و انتم تقرأون خذو راحتكم على الاخر. انا عن نفسي قاعده اشرب قهوه و اجاوب على الاسئله لكن قبل كل شي خمنوا كم عمري بالضبط؟ يعني انا ما عمري ٣٠ و تحت ٣٥ قربتها لكم ههههه بس ايش تتوقعون . رح اقسم الاسئله على جزئين لإني ما شاء الله اخذت راحتي في الإجابات بزياده يعني جلست ثلاث ساعات و ربع اجاوب عليها فقط . يلا أتمنى لكم وقت ممتع مع القراءة
١-اقتربت من عمر الثلاثين و اشعر بالقلق، شعرت ان احلامي كالسراب و يجب أعيش الواقع الذي لطالما كنت اريد تغييره هل من نصيحة؟
اذكر لما صار عمري ٢٩ سنه، حسيت ان الدنيا بداءة تجري و جلست افتكر كل شيء حلمت فيه من الطفوله الى عمر ٢٨، كاني كنت بحلم و فجإه احد صحاني على خبر مفجع. وقتها كانت عندي أحلام كثيره جدا ماشاء الله و كمان في هذاك الوقت قررت اني اترك الوظيفه و انشاء موقعي و من غير كنت قاعده ادور على شغل إضافي تحسباً الموقع راح يأخذ ميزانيه كبيره، عادا اني كنت مسجله في دوراة عشان الموقع و الكتابه يعني لازم اعرف ايش منتظرني فيهم، و كمان كنت أحاول اكمل دراستي و من غير عندي اهداف شخصيه . و هنا بداءة اضغط نفسي ، كنت كل يوم اصحى من النوم و اسوي مليون شغله بوقت واحد من غير ما احس عشان بس ألحق الوقت. الى ان مر ٦ شهور و شفت ان حالتي قاعده تزيد سوء و صار عندي خوف و قلق وان خلاص ضاع الوقت و ضاعت احلامي و حياتي معاه
بيوم كنت جالسه عند باب المدخل الساعه ٥ العصر نفس جلستي لما كنت استنى ابوي الله يرحمه لما كنت بعمر التسع سنين عشان يوديني المزرعه و كنت احسب الدقايق من الخوف انه يتأخر، بس الحين انا بعمر التسع و العشرين و عندي خوف من الثلاثين و ايش منتظرني فيه بقلق و يإس. مسكت جوالي و بحثت عن الخوف في سن التسع و العشرين في اليوتيوب، لاني ابغى اسمع احد يتكلم عشان احس انه يكلمني مباشره . طلع لي بودكاست لامريكي مستضيف واحد دخل الثلاثين من فتره و جلس يتكلم عن تجربته. و جلسوا اثنينهم يتناقشون عن الامر و كل واحد تكلم عن تجربته بشافيفه. من هنا عرفت ان حتى الامريكان مثلنا مع انهم يدعون حرية الرائي و الاستقلاليه. بس حتى هم يحلمون بالاستقرار العائلي ، الواحد يتمنى يتزوج و ينجب ويكون عنده بيت و رصيد في البنك. انا حسيت براحه مره ان في احد مثلي في هذه الدنيا عايش تجربتي، كلامهم هون علي كثير صراحه. و وقتها قررت اني اترك امري لله ولا افكر فيه. و بما اني الحين بعمر الثلاثين حابه انصحك كم نصيحه
١-الي تحس فيه عادي جدا و فيه كثير مثلك عاشوه و حسوا فيه
٢-عيش عمرك الحالي ولا تفكر بشيء بالمستقبل عشان ماتندم على الوقت الي تضيعه الان في شيء ماهو موجود
٣- اولاً قسم احلامك على فترات لا تضغط نفسك و تحاول تحقيقهم في وقت واحد لان كذا رح توتر نفسك ، ثانياً انت العمر قدامك يعني لو حققت كل شيء الان بعدين ايش رح تسوي. حط خطط للكل حلم و ابداء بالسعي بالحلم الي تحس ان إنجازه ماهو صعب او رح ياخذ وقت كبير منك
٤-لاتفقد الامل بنفسك و الحياه، و الاهم ان لاتفقد عزيمتك و احلامك رح تتحقق باذن الله يعني العمر ماهو عائق للانجاز و الحلم. لو عمرك ٩٠ سنه انت تقدر تحقق امنياتك بإذن الله
٢-هل يعتبر عمر الثلاثين افضل عمر؟
بعد تجربتي بمرحلة الطفوله، المراهقه، العشرين ، و حاليا الثلاثين احس هو افضل عمر عشته في حياتي. لاني صرت مستقله في فكري ، رائيي، و شخصيتي. نضجت كثير و صرت اعرف ايش ابغى من الحياه. يعني في العشرين كنت متخبطه بامر الوظيفه ما اعرف ايش ابغى و حتى لما قررت ابداء موقعي كنت متخوفه من الامر بس لما دخلت الثلاثين حسيت اني واثقه من نفسي ومن قراري الحمدلله
٣-هل الحياه تتغير بعمر الثلاثين؟
تتغير كثير سواء شخصيه سواء تفكير سواء الناس المحيطه فيك و حتى حياتك اليوميه. على سبيل المثال انا ماعندي أصدقاء الان و كتبت عن هذا الامر من قبل، مستحيل ارجع علاقتي في زميلاتي ايام الدراسة ليش ؟ لإني تغيرت و اهتماماتي غير عنهم، يعني على سبيل المثال انا عزباء الان احب أتكلم عن أشياء تناسب و ضعي الحالي عنايه شخصيه ، هواياتي، كتب قراءتها، الكتابة ، تطوير الذات ، مسلسلات و افلام عجبتني يعني أشياء من كذا. لكن زميلاتي السابقات كلهم ما شاء الله متزوجات فمواضيعهم كانت عباره عن بيتهم ، ازواجهم و اطفالهم، كنت احس ما في جامع مشترك ما بينا خلاص و العلاقة بارده مره، لذلك قررت اني امشي في حياتي عوضاً اني اضيع وقتي مع اشخاص يعتبرون غرباء عني مع انهم كانوا اكثر ناس قريبه مني و عايشين حياتي و وضعي
٤-كيف حسيت لما دخلت الثلاثين؟
لحد الان اذكر ليلة يوم ميلادي فجأة شفت انها الساعه ١ ونص بالليل و صار عمري ثلاثين حسيت ان ما في فرق هو مجرد رقم، كنت حاطه ببالي اني رح انهار و اتعب طلع العكس الا نسيته أصلا و كنت عايشه حياتي بالكامل. لكن لاحظت الفرق لما مر علي كم يوم بداءة احس بفرق بطريقة كلامي و تفكيري بشكل تلقائي ما ادري ايش السر بالضبط. كنت اكتب يومياتي باجتهاد هذاك الوقت و كنت ارجع اقراء انا ايش كتبت و طلعت الفرق ان اسلوبي و تفكيري اختلفوا بفتره بسيطه ماشاء الله
٥-ماهي فوائد عمر الثلاثين؟
من فوائد عمر الثلاثين اني بداءة اثق في نفسي و قراراتي الشخصيه يعني لما كنت في العشرين كنت أخاف من اتخاذ القرارات و ما عندي ثقه بقدراتي وما اجازف ابدا حتى لو شيء بسيط لإني أخاف اندم يعني كنت على سبيل المثال أخاف اشتري كتاب أقول لو اقراءه و اندم اني اشتريته يعني كنت بهذه الحالة من التردد و الخوف، لكن الحين عادي اشتري كتاب بدافع التجربة و اكون مرتاحه ايش ما كان رائيي فيه عادي ماهي مشكله كبيره. صرت اتحمل مسؤولية قرارتي و مايهمني ايش غيري يقول لإني قوية شخصيتي تعرفت عليها و صرت اعرف انا ايش ابغى ، و قبل أي قرار ادرسه مضبوط و امشي فيه لو ايش كانت نتيجته انا متقبله لإني قادره على التعلم منها بإذن الله و تصحيح اخطائي. تعلمت اني ما احكم على احد يعني لو شخص لابس جاكيت في الصيف ما اجلس أنتقده جواتي ، الا صرت افكر باحتماليات ممكن يكون فيه مرض جلدي و حاب يداريه او يكون من الناس الي تبرد من نسمت هواء خفيفه يعني اعطي الناس اعذارهم وما اسبق الحكم عليهم قبل ما أتكلم معهم و اعرف الحقيقة . لو بكتب عن الفوائد مارح أخلص صراحه لإنها كثيره جدا الحمدلله
٦-كيف ابداء الحياة بعمر الثلاثين؟
تبدأها مثل أي عمر ثاني لكن بعمر الثلاثين رح تكون اكثر حكمه و نضج، يعني مارح تتسرع و تجلس تحسب مليون مره قبل ما تتخذ القرار و تحط احتماليات كثيره عليه. و غالبا تكون انت عرفت ايش تبغى تسوي يعني مثلا ايش نوع الوظيفه الي تبغاها او هل انت مستعد انك تتزوج او لا ، تصير تسمع صوت نفسك من داخل صوت واضح عكس قبل تحس أصوات كثيره جواتك من غير أصوات الناس الي حولك تأثر فيك. و العمر مثل ما يقولون مجرد رقم يعني لا تركز عليه و ركز على امنياتك و اهدافك في الحياه وبس لا تربطها بعمرك
٧-هل يعتبر الشخص بعمر الثلاثين كبير بالعمر؟
طبعا لما كنت صغيره كنت اظن هذا الشيء أي شخص في الثلاثين معناته كبير وراحة عليه هههه، لما صرت فيه حسيت اني بقمة شبابي و صحتي ما شاء الله. صرت اهتم بصحتي النفسية، الجسديه ، الروحيه، العقليه ما شاء الله اكثر من قبل. صار عندي وعي ان العناية بشكل عام مهمه ما هو شرط بعمر الثلاثين بس بهذا العمر نضجت و تحملت مسؤولية نفسي
