عشت روتيني وانا تسعه وعشرين بعمر الثلاثين

اهلاً يا أصدقاء.. اليوم جايتكم بتجربه ثالثه من سلسلة تجاربي عيش روتيناتي السابقة. هذي المره رح يكون روتيني وانا باخر العشرين، اخترت هذا العمر لانه نقطه فاصله او انتقاله لفئة عمريه جديده

صحيح كنت عايشته بقلق وكان عندي خوف وضغط من سن الثلاثين، بس فيه أشياء بروتيني كنت حابتها ومستمتعه فيها ما شاء الله لدرجة اني مفتكره كل شيء كنت اسويه بوقتها. لذلك حابه أشارك معكم روتيني وانا تسعه وعشرين بعمر الثلاثين

كيف كان روتيني

وقتها انتقلت لخيبر وقررت اني ابداء بروتين جديد خاصه كنا تونا طالعين من الازمه الصحيه. فصرت انام بالليل واصحى الفجر عشان اقضي الصباح كله بالكورسات والتعلم. كنت اخذ كورس بالكتابة وكورس بأنشاء الموقع وبعد ما خلصهم اجلس اسوي كم مهمه تقنيه بالموقع. على الساعة ١٢ الظهر اصلي وابداء اجهز الغداء وبعدها ما انام اقضيه على قناة ذكريات الى اذان العصر

اصلي العصر و استنى الشمس تبرد شوي واقوم اجهز لطلعتي للممشى . اخذ معي أحياناً اللاب توب عشان اكتب مواضيع عشوائية وأحب اخذ كتاب للقراءة والنوتة حقتي عشان ادون. اجلس هناك الى اذان المغرب واحياناً الى اذان العشاء. ارجع البيت استحم وبعدها اتعشاء اصلي صلاة العشاء وانام على الساعة ٩ ونص او ١٠ بالليل

كيف كانت شخصيتي

كنت مشغولة بتحقيق الامنيات ولسى ما تعلمت اعطف واحن على نفسي. و ايضاً اعرف جزء بسيط عن الأشياء الي احبها. وكنت أحاول واجتهد عشان أعيش او احقق لو جزء صغير من احلامي بس كان فيه عراقيل كثيره بطريقي بس ماكنت اعرف ليش او ايش سببها! فكنت تائهة بزحمة الروتين والتفكير والمشي كان يريح اعصابي من كل هذا الضغط

كنت متفائلة ما شاء الله رغم خوفي من سن الثلاثين وايش منتظرني فيه الا اني كنت أقول رح احقق على الأقل الاستقرار المادي عن طريق الموقع بأذن الله وكانت سقف امنياتي عاليه عليه كثير. وبنفس الوقت كان عندي شعور عميق بعدم الانتماء باي مكان ووحده داخليه وانه طيب انا ايش مصيري بعد كذا هل رح اظل بهذا الحال والوضع؟ فيه علامة استفهام بعقلي عن حياتي

كيف عشت الروتين بعمر الثلاثين

أولاً حابه اعتذر إني رح اسوي الروتين بالمقلوب للأسف يعني من العصر الى الفجر عكس قبل تمام لأني ما قدر انام في الليل وانا توني صاحية عشان تجربه

كوب قهوه — **الساعة ٤ العصر**

القهوة أولاً

صحيت صليت الحمدلله وقريت الاذكار وحصنت نفسي وطبعاً بهذا العمر كنت لسى ما بديت اني اسوي روتين الاستيقاظ مثل الان تمام 😅. بعدها بسوي القهوة كنت اشرب قهوة (كبسولة ) واحطها بالكوب هذا لسبب عشان تحتفظ بحرارتها لفتره طويله لأني احب اشرب قهوتي حاره

اول شيء ادخل كورس الكتابة وانا فاتحه الموقع استرجعت الأيام هذيك وانا متحمسه انام عشان أقوم احضره😭❤️ ومره انبسط فيه. شايفين الصورة ، هذا كان وضعي بذاك الوقت . المهم موقع الدوره ما دري ايش فيه صوت الفيديوهات فيه مشكله غير الحمدلله انه فيه خاصيه نقدر نقراء الكلام الي المدرس يقوله ففعلتها

كنت احب افطر شوفان كثير ما شاء الله ما عرف ليه. المهم بسويه الحين و طبعاً شاركت الطريقه معكم من قبل فامايحتاج ارجع اكتبها لكم

هذا الكورس مره رائع صراحه لولا الله ثم هو كان ما قدرت افتح الموقع واسوي كل هذا الحمدلله. سمعت كم فيديو كذا والحين حابه اسوي تعديل بالموقع بسيط ولي هو اني اغير بالبانر شوي . ايش رأيكم؟ فيه اختلاف قليل صح بس عجبتني الجملة الي حطيتها احسها تعبر عني كثير

الطلعه رح تكون الان لان مستحيل اطلع الفجر 😅 او حتى العصر لان الممشى هنا بعيد عني تقريباً ٢٠ دقيقه مشي. عكس خيبر كان اقل من ٥ دقائق وانا فيه 😪 . فعشان كذا طلعت الحين واخذت النوتة عشان ادون وكتاب عشان اقراء وطلبت لي قهوه بارده عشان ابرد على قلبي من الحراره. يارب لطفك مره حر رغم ان الأرض رطبه بس سبحان الله ما فيه فائده

وخارج عن موضوع الروتين شيكولي من جاء جلس جنبي ياناس عليها ما شاء الله كيوت

نظام اكلي نفس الان واطبخ نفس نوعية الطبخات لا جديد فعشان كذا ما صورت معكم الطبخة وهذي الصورة قديمة

سبحان الله كان نفسي من مده اشوف مسلسل اردني قديم، بسبب قناة ذكريات تعرفت عليها ومره حبيتها صراحه. مادري ليه بس المسلسلات القديمة جميله جداً وفيها الفه، بساطه ودفئ هل انا الوحيدة الي احس كذا ولا انتم نفسي

استحميت الان وطبعاً مثل ما خبرتكم ما كان فيه روتين بشره لحد الان 🥲. والحين باكل عشاء خفيف زبادي وفواكه انا ماعر ف ايش سر هوسي بهذا العشاء من سنين ما شاء الله 😂. ماعلينا كان نفسي بالشمام صار لي مده لو بس اشم ريحته اعشقها مره وترجعني لذكريات وايام لطيفه عشتها. المهم بصلي القيام واستنى يأذن الفجر وانام ان شاء الله

رأيي بالتجربة

تجربه جميله وخلتني استرجع ذكريات بسيطة لكن اثرها بنفسي كبير لدرجة اني احن لها بهذا الوقت. بس كنت ضاغطه نفسي بالروتين عشان احقق مبتغاي بسرعه. لكن احس الروتين فيه من روتيني الحالي باختلاف كم حاجه بسيطة مثل العناية بالبشره والكورسات أتوقع ِ🤔. لكن الحمدلله دخلت الثلاثين وماصار فيني الا العافية 😅 و انشاءة الموقع وانشر فيه وصار عندي روتين عنايه الحمدلله . والحمدلله علاقتي بنفسي ما شاء الله ممتازة وصرت افهمها واعرفها اكثر واحن عليها من قبل بكثير

بس فيه حاجه الي هو المستقبل المجهول هذا الشيء كان مخوفني زمان ومسبب لي عدم استقرار نفسي وللأسف ظل معي لحد شهر ذي القعدة هذي السنة ووقتها قررت اني ابداء رحلت تهدئة جهازي العصبي عشان اوقفه

ما تدرون قد ايش صعب انكم تعيشون بالعماء وبخوف من حياة مالكم تحكم فيها وممكن يصير أي شيء يحطم استقراركم النفسي بثانيه. ما علينا ايش رأيكم بتجربة هذي؟ ومن خلال عرض يومياتي لكم سابقاً هل تحسون انه فيه اختلاف ام لا؟

♥️شكراً لكم على القراءة وأتمنى لكم ليلة سعيدة ومريحة

Read The blog