اقضوا معي|اربع ايام من حياتي

في الاربع الايام هذه خلصت قراءة روايه وايش رائي فيها، جربت اشرب القهوه بشكل مختلف، سويت طريقه جديده للبسكوت. و ايش الموقف الي صار لي في عيد الاضحى؟ وتكلمت عن مشاعرنا وتأثيرها علينا،

يوم الثلاثاء

الساعه ٩ الصباح

في قلبي انثى عبريه

واخيرا من بعد مده خلصت الروايه صحيح ممله ولكن تعلقت بشخصية ريما وحياتها المتعبه. ألمني الي مرت فيه وكيف حبت جيكوب من كل قلبها رغم اختلاف الثقافات والديانات ونمط الحياة.

حبته واخلصت له لدرجة انها كانت تدعي له بقلب بريء ان بيوم من الايام ربي يهديه لطريق الحق وما يئست، على رغم من معرفته بحبها واخلاصها له تخلى عنها بقلب بارد وأرسلها بعيد عنه ببلاد غريبه بحجت زعل زوجته. انا مو ضد انه يحل الخلاف الي صاير في البيت وهو كان منحط تحت ضغط كبير ومقدره هذا الشيء بس الي قهرني انه كذب على ريما وراوغ وهي صدقته. رغم خوفها الشديد انها ممكن تكون هذي اخر مره تشوفه فيها. راحت لبلد ثاني وكانت متأمله انه يظل الشخص الي حن عليها وهي صغيره والي قطع لها وعد ان رح يرجعها بفترة شهر. ظلت تحسب شهر شهرين ثلاث وكانت ترسله جوابات انها بخير وصحه رغم انها تعاني وعايشه بمراره والشيء الصعب انه كان يقراء جواباتها و يطنش بحجت انه ما عندي رد ، ما عندي حيله ما عندي مبرر وهو الرجل وصاحب القرار و الكلمه. ظلت على امل انه يوفي بالوعد حتى راحت لعالم اخر أفضل من العالم الحالي وخلته مع ندمه وحسرته وتردده. فصار يبحث عن أي معلومه بسيطه عنها كيف كانت عايشه وهي بعيده عنه ايش تحب هل كانت مبسوطه . ممكن كان يسأل عنها عشان يبغى يكفر عن كذبه عليها وان هو السبب بالي مرت فيه باخر ايامها، بس بعد ايش بعد ما راحت ريما و ما عادت ترجع

الساعه ٤ العصر

بعد ماخصلت الروايه حسيت بتعب نفسي بسبب احداثها فحبيت اغير جو وسويت هذا البسكوت، انا مو من محبين التمر فجربت هذي الطريقه عشان اتقبل طعمه وطلعت تحفه رغم اني ١ بالميه ماعندي رضا بالشكل بس عادي المهم الطعم

يوم الاربعاء

الساعه ١ ونص الظهر

الامر صار رسمي

رسميا نومي تلخبط وصحيت الساعه ١٢ الظهر بحيره هل اطلع او لا بما انه اليوم الاربعاء فقررت اني اطلع واروح للمقهى الي احبه

في البدايه حسيت بغرابه انو اجي بذا الوقت؟ فا بكذا يكون خلاص ختمت جميع الاوقات في هذا المقهى، بس افضل وقت الصباح عن الظهر والليل. مع اني زمان كنت اعشق الليل فيه بس لان مرت فتره طويله علي وانا اجي الصباح صرت احس بعدم انتماء وان في شي غريب علي

الساعه ٧ المساء

انا مو من محبين هذي اللعبه بس حسيت بملل قلت اجرب العبها. حاولت اسوي مهمه بس ماقدرت مره صعبه، فا على طول رحت سويت لهم تغيير بالمظهر بما ان هذا الشيء الوحيد الي احب اسويه بهذي اللعبه بعد السواقه في الشوارع

من العابي المفضله هي اساسن كريد ثورة فرنسا، راي مان، اوفر كوكد. احس تبسطني مره وتخليني استمتع بالعب خاصه اوفر كوكد ممكن تبين انها لعبه للاطفال بس مره مسليه وخاصه لما يبداء الوقت يعدي واحنا ماخلصنا الطلب هنا الوضع يقلب ضحك على الاخطاء الي نسويها عشان ننجز

الخميس

الساعه ١:٤٠ الظهر

انا مو من محبين شرب القهوه بكوب شفاف ، بمعنى اصح ما احب اشوف القهوه الي اشربها احب اخلي شكلها مجهول بالنسبه لي مادري ايش السبب. بس قلت خليني اجرب هذي المره التجربه ماهي سيئه ممكن اعيدها مره ثانيه

الساعه ٩ المساء

تفويض الامر لله

اليوم كان من الايام الي اصحى فيهم من النوم واحس بضيقه فضيعه احاول انجز واشغل نفسي بس احس ما اقدر اداري مشاعري واحاسيسي ، فبعدها بساعات عرفت السبب . في عيد الاضحى حصل لي موقف وكنت مخيره فيه سألت الله ايش اسوي فتصرفت على اختيار ربي لي بدون تفكير والامر تيسر من عنده دبرلي المسأله بدون ما اجتهد، ومن وقتها صرت ما اتعب بالتفكير ولا اجهد نفسي

لاني تعلمت اني افوض امري لله وربي رح يدبر الاقدار بمعرفته. فاليوم سويت نفس الشيء تركت الامر لله وبس يا الله قد ايش فرق معي الامر ماعدت مهتمه ايش بيصير او كيف وشلون . صرت احس ان في امور انا ما اقدر عليها وقبل كانت تعبني نفسيا وتسبب لي قلق وضغط نفسي من لما اتبعت هذا الاسلوب خف موضوع التوتر من حياتي الحمدلله

الجمعه

الساعه ٢الظهر

تبدل الاحوال

عجبني موضوع القهوه بالكوب الشفاف فرجعت سويته اليوم. الحمدلله اليوم افضل من امس بكثير ، فجلست أتأمل سبحان الله كيف الاحوال تتغير بثواني من غير ماننتبه. احيانا نحس بفقدان الامل وان رح نظل نعاني لفتره طويله بس يصير شيء ويقلب الموازين

سمعت معلومه مره ان السعاده ٥٠ بالميه جينات و ٤٠ بالميه نمط حياتنا اليومي بمعنى هل انا سعيده بروتيني اليومي من نوم اكل وشرب وعلاقات واشياء ماديه ، اخر شيء ١٠ بالميه المشاعر المؤقته مثلا فرحت تخرج وفات احد قريب وظيفه جديده زواج الى اخره . بالأضافه اني دائما كنت اسمع جمله ان مشاعرنا ماتمثلنا، يعني اذا كنت معصبه اليوم وامس مو معناته اني انا شخص سيء او اوصف نفسي اني شخص عصبي بس من موقفين عصبت فيهم هذي بنهاية الامر مشاعر. اليوم انا حزينه ممكن بعد ساعه اكون بقمة السعاده المشاعر تتغير لكن هويتي هي الي ثابته هل انا اقدر نفسي احب نفسي واحتوي نفسي هل نيتي سليمه تجاه نفسي والي حولي هذا هو الشيء الي يمثلني من وجهت نظري. واني اتعلم من اغلاطي واطور من نفسي ما اكون ثابته واعيد واكرر بنفس الغلط